Elitnyja paŭnočnakarejskija kamandas, uziatyja ŭ pałon pad Kurskam, dali pieršaje vialikaje intervju
Dva paŭnočnakarejskija śpiecnazaŭcy z elitnaha padraździaleńnia pry Hałoŭnym raźviedvalnym biuro KNDR, zachoplenyja siłami USU ŭ minułym miesiacy pad Kurskam, dali vialikaje ekskluziŭnaje videaintervju haziecie Chosun Ilbo. Heta pieršy vypadak, kali paŭnočnakarejskija sałdaty, nakiravanyja dla ŭdziełu ŭ bajavych dziejańniach suprać Ukrainy, pahadzilisia na taki farmat razmovy.
Bujnaja paŭdniovakarejskaja hazieta Chosun Ilbo praviała pieršuju vialikuju razmovu z dvuma elitnymi śpiecnazaŭcami KNDR, jakija byli ŭziaty ŭ pałon ukrainskimi śpiecsłužbami ŭ Kurskaj vobłaści Rasii.
U intervju pryniali ŭdzieł 26-hadovy snajpier Ry i 21-hadovy šturmavik Pek (poŭnyja imiony sałdat nie raskryvajucca). Abodva da trapleńnia va ŭkrainski pałon pad Kurskam słužyli ŭ Siłach śpiecyjalnych apieracyj Karejskaj Narodnaj armii (KPASOF) pry Hałoŭnym raźviedvalnym biuro KNDR (viedamstva adkaznaje za špijanaž u inšych krainach).
Pa słovach pałonnych, jany adzinyja syny ŭ svaich siemjach i pierad adpraŭkaj u Rasiju nie viedali, kudy dakładna ich nakiroŭvajuć.
Ry rodam z Pchieńjana. Jon byŭ snajpieram u elitnym padraździaleńni. Za dziesiać hadoŭ słužby jon ni razu asabista nie bačyŭ svaich baćkoŭ. A praź niekalki miesiacaŭ paśla demabilizacyi Ry chacieŭ trapić va ŭniviersitet, ale kamandzir paviedamiŭ, što jaho nibyta adpraŭlajuć «za miažu na navučańnie», ale potym kinuli na pieradavuju pad Kurskam zmahacca razam z rasijanami suprać ukrainskich vojskaŭ.
«Mianie adpravili ŭ Rasiju 10 kastryčnika minułaha hoda. Da hetaha ja miesiac udzielničaŭ u likvidacyi nastupstvaŭ pavodki ŭ svajoj krainie. Potym nas adpravili ŭ vučebny centr, a ŭžo adtul — va Uładzivastok.
Našyja treniroŭki ŭ Rasii zaklučalisia nie tolki ŭ fizičnaj vynoślivaści. Jany byli ideałahičnymi. My treniravalisia tak, niby ad hetaha zaležała naša žyćcio. Razam sa mnoj z Paŭnočnaj Karei na navučańnie ŭ Rasiju pryjechali kala 2500 sałdat. Z rasijanami my hutaryli praź pierakładčyki ŭ smartfonach — hetuju technałohiju my raniej nikoli nie nazirali», — raspaviadaje Ry.
Jon dadaŭ, što aficery Ministerstva dziaržaŭnaj biaśpieki KNDR adsočvali lubyja razmovy i pierasoŭvańni paŭnočnakarejskich sałdat, a taksama chłusili im, što, naprykład, «usie apieratary dronaŭ z ukrainskaha boku na samaj spravie źjaŭlajucca paŭdniovakarejcami».
Ry adznačaje, što pad Kurskam jon i jaho padraździaleńnie natrapiła na «djabalski dron». Piać pabracimaŭ sałdata zahinuli, zastaŭsia jon adzin.
«Djabalski dron», jak nazvaŭ jaho Ry, heta vielmi vialiki bieśpiłotnik, jaki niasie bomby. Praź infračyrvony datčyk dron moža šukać celi i skidvać snarady. U hrupy atrymałasia schavacca ad drona ŭ biaśpiečnym miescy, ale a 3-j hadzinie nočy tudy pryjechali ŭkrainskija vajennyja na bronietransparciorach. Jany pačali abstrelvać pazicyi paŭnočnakarejcaŭ z kulamiotaŭ. Jak tolki Ry ź inšymi sałdatami pačali adstupać, ich atakavaŭ bieśpiłotnik.
«Ja adziny, chto zastaŭsia, surjozna paranieny ŭ pravuju ruku i skivicu ŭ vyniku ŭdaru ŭkrainskaha drona. Heta byŭ moj pieršy vopyt sapraŭdnaha boju. Kali ja ŭbačyŭ cieły svaich tavaryšaŭ, u majoj hałavie praniesłasia mnostva dumak. Niekatoryja ŭzryvali siabie hranatami, kab paźbiehnuć pałonu, bo trapleńnie ŭ pałon u nas ličycca dziaržaŭnaj zdradaj. Pach kryvi maich tavaryšaŭ usio jašče sa mnoj navat ciapier».
Inšy paŭnočnakarejski sałdat Pek raspavioŭ, što taksama doŭha nie bačyŭ svajakoŭ i nie čakaŭ adpraŭki na rasijski front pad Kursk. Pa jaho słovach, ułady KNDR aficyjna chavajuć ad svajho nasielnictva fakt adpraŭki sałdat u Rasiju dla vajny suprać Ukrainy, bo aścierahajucca mahčymaj niehatyŭnaj reakcyi žycharoŭ krainy.
Pek adznačyŭ, što ŭžo potym u Rasii im kazali, što paŭnočnakarejskija sałdaty «buduć vyzvalać Kursk i achoŭvać tam rasijskija jadziernyja abjekty».
Razam z hetym Pek abvierh śćviardžeńni ŭkrainskich vajskoŭcaŭ ab tym, što paŭnočnakarejskija vajskoŭcy vykarystoŭvalisia rasijanami ŭ jakaści čałaviečaj prynady dla vymańvańnia ŭkrainskich bieśpiłotnikaŭ.
«Ja ŭpieršyniu čuju pra heta», — zajaviŭ Pek.
Sałdat dadaŭ, što ŭsio jašče raźličvaje na viartańnie ŭ KNDR. Tym časam paŭnočnakarejski snajpier Ry zajaviŭ, što surjozna razhladaje mahčymaść paśla pałonu adpravicca žyć u Paŭdniovuju Kareju.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta44
Kamientary