Litoŭskim pamiežnikam paŭhoda tamu dazvolili stralać pa mieteazondach ź biełaruskaj kantrabandaj, ale tyja pakul ni razu nie stralali
Mieteašary z kantrabandaj znoŭ palacieli ź Biełarusi ŭ Litvu. Z pačatku hoda ŭžo pierachoplena bolš za 200. Adnak častka ŭsio ž dasiahaje mety. Ich nie źbivajuć, choć majuć prava, piša LRT.
Mieteazondy z hruvastkimi skrutkami nielehalnych tavaraŭ znoŭ palacieli ź Biełarusi ŭ Litvu paśla pierapynku.
I chacia ŭžo paŭhoda jak litoŭskim pamiežnikam dazvolena stralać pa takich zondach, nie źbivali ich pakul što ni razu. Pra heta ahienctvu BNS raskazaŭ pradstaŭnik Dziaržaŭnaj słužby achovy miažy Hiadrus Mišucis: «Takoha vypadku jašče nie było».
Pamiežniki dziejničajuć pa-inšamu: adsočvajuć miescy, dzie šary pryziamlajucca, pierachoplivajuć hruz, sočać za pieramiaščeńniem kantrabandystaŭ. Pracujuć i kryminalisty. Užo byli vypadki, kali ludzi traplali ŭ pastki, sprabujučy zabrać cyharety. U noč na 14 krasavika pierachoplena 11 zondaŭ i 2 bieśpiłotniki. Zatrymana čaćviora padazravanych. U inšuju noč schapili jašče dvuch — prama na miescy pasadki zonda.
Ahułam z pačatku hoda litoŭcy zatrymali ŭžo 210 zondaŭ i 21 dron. U ich — 328 tysiač pačak cyharet. Zafiksavana 60 vypadkaŭ zatrymańnia ludziej, što pryjechali pa tavar.
Kudy kantrabanda pryziamlajecca
Usio zaležyć ad vietru. Kali toj dźmie ź Biełarusi ŭ bok Litvy — šary adpraŭlajucca ŭ šlach. Usie raźliki — vielmi składanyja: patrebna viedać, kolki hielija ci hazu zapraŭlać, kolki važyć hruz i jak daloka jaho zaniasie.
U minułym hodzie adzin zond pryziamliŭsia… na dach šmatkvaternaha doma ŭ Druskininkai. Inšy — prosta ŭ aeraporcie Vilni. Byli i pasadki ŭ centry Vilni, u Alitusie, navat na terytoryi vajskovaj častki.
Kantrabandysty šukajuć novyja šlachi
Mieteazondy — nie adziny mietad. U studzieni pamiežniki znajšli tunel u 25 mietraŭ na samym rubiažy ŭ Šalčyninkskim rajonie. Jość padazreńnie, što praź jaho mahli nie tolki cyharety pierapraŭlać, ale i mihrantaŭ. Idzie rasśledavańnie.
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary