U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta
Biełaruskaha milicejskaha stukača, jaki ciapier žyvie pad imieniem Vital Kaminski, znajšli va Ukrainie. Apraŭdvajučysia, jon naharadziŭ historyj, kruciejšych čym u barona Miunchaŭziena. Pašyrać cyničnuju chłuśniu staŭ błohier-kanśpirołah Virus.
Va Ukrainie razhortvajecca zachaplalnaja historyja ź biełarusam, da jakoha źjavilisia pytańni ŭ kontrvyviedki — niechta paviedamiŭ śpiecsłužbam, što pryznaŭ u Vitali Kaminskim, jaki žyvie ŭ Kijevie i vydaje siabie za vieterana ATA i paŭnamaštabnaj vajny, niehałosnaha ahienta biełaruskaj milicyi Vitala Turaŭca.
«Z čałaviekam adbyvajecca niejkaja nieviadomaja jo**naja chu*nia», — apisvaje situacyju błohier-kanśpirołah Vital «Virus» Kandracienka, jaki daŭ Kaminskamu trybunu dla samaapraŭdańniaŭ u svaim videabłohu na jutubie. Śćviardžajecca, što Kaminski źviarnuŭsia da jaho sam.
Čytajcie taksama.Chto taki błohier-kanśpirołah Virus, jaki štodnia abražaje i plažyć biełaruski demakratyčny ruch?
Hetaja historyja važnaja dla razumieńnia taho, jakimi ludźmi mohuć apieryravać biełaruskija śpiecsłužby va Ukrainie, i kudy tyja sprabujuć ukaraniacca.
Heta badaj pieršy vypadak, kali «lehienda» zasłanca nastolki nie supadaje z realnaściu, što razam z zafiksavanaj historyjaj raniejšaha supracoŭnictva z orhanami dazvalaje adnaznačna skazać, što čałaviek nie toj, za kaho siabie vydaje.
«Naša Niva» pahladzieła videa Virusa «Jak sprabujuć padstavić čałavieka, jaki vajuje va Ukrainie, praz bazy Kibierpartyzan i Biełpoła». Pierakazvajem jaho źmiest i tłumačym, chto nasamreč hety «hieroj vajny», jakoha raskryli va Ukrainie.
«Najlepšy juryst Biełarusi» staŭ miljanieram
Vital Kaminski ciaham paŭtary hadziny strymu nie vypuskaje z palcaŭ cyharetu, niervova skurvajučy adnu za adnoj. Treba adrazu skazać, što
Kaminski — heta jaho čaćviortaje proźvišča. Da taho čałaviek, jaki siadzić na videa pad bieła-čyrvona-biełym ściaham, byŭ pa pašparcie Sidaravym, paśla — Andrasovičam, potym — Turaŭcom.
My ścisła i schiematyčna pierakažam nievierahodnuju historyju Sidarava-Andrasoviča-Turaŭca-Kaminskaha.
Pavodle mužčyny, jon naradziŭsia ŭ bahataj siamji. Pakul baćka-pradprymalnik vyrašaŭ pytańni pa kamiercyi, a adnahodki hulali z cackami, Vital vytočvaŭ sabie kałodki dla noh, kab dastavać da piedalaŭ «Miersedesa», na jakim jeździŭ u škołu.
Kali Vitalu było 10 hod (u 1992 hodzie), baćka kupiŭ jamu kampjutar, i chłopčyk staŭ pierapisvacca ŭ internecie (!) ź niejkim ukraincam z Adesy, jaki zaprasiŭ jaho — 10-hadovaje dzicia ź Minska — va Ukrainu.
Na arhumient, što tak prosta tudy nie zajechać, toj ukrainiec paabiacaŭ jamu pakazać, dzie možna nielehalna pierachodzić hranicu.
I voś tak, pačynajučy z 10 hod, Vital šmatrazova nielehalna byvaŭ va Ukrainie, «hulaŭ pa Čarnobylskaj zonie». Pakrysie sfarmiravałasia simpatyja da hetaj krainy.
Adnak paśla škoły chłopiec pajechaŭ u Rasiju, vyvučyŭsia tam na jurysta. U videa ŭ adnym miescy hučyć niejki «maskoŭski vyšejšy dziaržaŭny kaledž», u druhim nazyvajecca «baŭmanka» — Maskoŭski dziaržaŭny techničny ŭniviersitet imia Baŭmana.
«Z 2006 hoda byŭ najlepšym jurystam u Biełarusi», — chvalicca Kaminski.
Jon zajmieŭ vialiki katedž u Raŭbičach, jaki ścierahli šeść achoŭnikaŭ, prykładna 10 miljonaŭ dalaraŭ na rachunku… Ale kali pačałasia historyja na Danbasie, to Vital idejna, u 2015 hodzie, pajechaŭ abaraniać Ukrainu. Byŭ pad Słavianskam.
«Vajuješ z 2015 hoda?», — pytajecca Kandracienka.
«Z 2015 roku ja vajuju», — nie pavioŭšy vokam adkazvaje Kaminski.
«Ja taksama», — padchoplivaje Kandracienka, jaki nie vajavaŭ ni chviliny.
Pa słovach Kaminskaha, u zonu ATA jaho «padciahnuli biełarusy», a potym jaho «zabrali va ŭpraŭleńnie vyviedki».
Paśla pačatku šyrokamaštabnaj vajny jon daviedaŭsia, što toje biełaruskaje padraździaleńnie, u jakim jon pačynaŭ, pierajmienavałasia ŭ Połk Kalinoŭskaha (imavierna, tut Kaminski kryva raskazvaje historyju biełaruskaha padraździaleńnia ŭ składzie «Azova»).
U Biełarusi ŭ Kaminskaha ŭ 2020 hodzie naradziłasia dačka i, kab jaje naviedvać u Minsku, jon «prychodziŭ u Biełaruś aściarožna i sychodziŭ aściarožna — nu, ja z raźviedki».
Žonku z dačkoj Kaminski vyrašyŭ pieravieźci ŭ Kijeŭ, tamu što sam jon užo nie moh ciškom praślizhvać u Biełaruś — pa jahonym maršrucie išli ruskija tanki. Tamu jon prydumaŭ śpiecapieracyju: u 2022 hodzie kupiŭ na svajo imia i imia žonki avijakvitki ź Minska ŭ Vilniu — kali nijakich pieralotaŭ ź Biełarusi na Zachad užo nie było, — čym spravakavaŭ ahientaŭ KDB pajechać u minski aeraport pad vylet rejsa. A žonka ŭ toj vyjhrany čas paniesłasia pa ziamli praz Polšču va Ukrainu.
Abduranyja kadebešniki kinulisia ŭśled za joj i pierasiakli miažu Ukrainy, dzie troch-čatyroch ź ich vyličyli i pasadzili na 15 hadoŭ.
Hieroj vajny
Pačatak vajny Kaminski sustreŭ u Bučy, «tamu što jamu sakretna paviedamili — i heta ŭžo možna raskazvać — maršrut, jakim buduć zachodzić ruskija».
Jon uziaŭ dvuchstvołku, «tamu što ŭ Pałku Kalinoŭskaha jamu bolš ničoha nie dali», i pajechaŭ sustrakać ruskich.
Tam, u Bučy i Irpieni, na jahonych vačach zabivali ludziej, adnu dziaŭčynku jon vyratavaŭ i vynies na rukach, atrymaŭšy ŭ śpinu tuzin strełaŭ ź vintoŭki — ale vyratavała broniekamizelka.
Z Pałka Kalinoŭskaha Kaminskamu pryjšłosia zvolnicca praz 6-7 miesiacaŭ, tamu što kiraŭnictva patrabavała ź jaho 20% ad zaroblenych bajavych za Bachmut nazad.
U adkaz na heta jon zajaviŭ kamandziru PKK «Kitu», što hrošaj addavać nie budzie, ale sam choča kiravać padraździaleńniem i maje ludziej, jakija buduć vajavać. «Kit» ža, maŭlaŭ, skazaŭ jamu ŭ adkaz «da pabačeńnia».
Paśla hetaha Kaminski trochu paboŭtaŭsia: sprabavaŭ u Internacyjalny lehijon, ale nie ŭziali, potym niejkija znajomyja adrekamiendavali ŭ 49 OŠB «Karpatśka Sič». I voś tam jon — demanstruje šaŭron — ciapier i znachodzicca.
Kaminski zapeŭnivaje, što jon hieroj vajny. U jahonych padraździaleńniach nie hinuli ludzi. A za apošnija hady jon skraŭ siem adzinak rasijskaj braniatechniki, u tym liku tank T-34.
Adnu takuju historyju Kaminski apisaŭ padrabiazna: jon pajechaŭ ź siabrami na rybałku, a akazałasia, što pobač pazicyi ruskich. Niechta z sasłužyŭcaŭ tudy prabraŭsia, skruciŭ 300-kiłahramovaje koła bronietransparciora i zakaciŭ jaho da svaich. Tady Kaminski skazaŭ: «Treba brać uvieś bronietransparcior», — i biez prablem skraŭ usiu mašynu.
Kaminski maje ŭznaharody «ad Zialenskaha i ministra abarony», ale kryŭduje na ŭkraincaŭ, tamu što «10 hod vajuju — a ŭsio jašče siaržant». Taksama jon moh by źjechać u Štaty, tamu što maje amierykanski dazvoł na žycharstva, ale nie robić hetaha — choča žyć va Ukrainie.
U Kaminskaha pry hetym niehatyŭnaje staŭleńnie da Sachaščyka, pałka Kalinoŭskaha i Cichanoŭskaj — heta tyja pytańni da surazmoŭcy, jakija karcieła zadać Kandracienku.
«Prosta dałba*by», — kaža Kaminski.
«Čamu ciabie pasprabavali źlić?» — pytajecca Kandracienka.
Imavierna, praz voś hetaje praŭdarubstva, ličyć Kaminski, u jaho i ŭźnikli prablemy va Ukrainie.
Ale ŭsio ž asnoŭnaja pryčyna, pryznajecca jon, u tym, što praź jaho va ŭkrainskaj turmie siadziać tyja samyja try-čatyry supracoŭniki biełaruskaha KDB.
Abyłhany
Akazvajecca — dalej užo tłumačyć Vital «Virus» Kandracienka, — što niejkija ludzi znajšli na «Čornaj mapie Biełarusi» padobnaha da Kaminskaha čałavieka, jaki zapisany tudy jak tajemny milicejski aśviedamiciel Vital Turaviec.
Turaviec z 2006 pa 2010 hod atrymlivaŭ hrošy ŭ «Łaryskory» — arhanizacyi, stvoranaj dla vypłat niehałosnym supracoŭnikam milicyi. U asnoŭnym heta šmatrazova sudzimyja marhinalnyja asoby, jakija pajšli na supracoŭnictva. Ich padsadžvali ŭ turemnyja kamiery, kab jany vypytvali infarmacyju ŭ źniavolenych. Toje, što śpisy takich infarmataraŭ trapili niezaležnamu hramadstvu — unikalnaje nastupstva 2020 hoda, anałahaŭ jakomu niama badaj ni ŭ adnoj krainy Jeŭropy.
Pra znachodku paviedamili ŭkrainskaj kontrraźviedcy. Inšyja detali nie pryvodziacca, ale situacyja apisvajecca jak «piz**iec».
Kaminski piarečyć, što nie, heta nie jon. I ŭvohule, u infarmacyi na «Čornaj mapie» šmat niedakładnaściaŭ: maŭlaŭ, tam napisana, što jon byŭ taksistam u «Ałmazie». Ale heta ž niapraŭda! A nasamreč jon byŭ suzasnavalnikam taksi «Ałmaz» — «i heta ŭsie viedajuć».
Kaminski śćviardžaje, što «možna pravieryć jahony rachunak», i što «čałaviek, u jakoha jość 10 miljonaŭ dalaraŭ» — heta jon pra siabie, — «nie budzie pracavać kiroŭcam».
U kancy robicca vysnova, što «musary Azarava razam z Kibierpartyzanami starajucca znajści ahientaŭ tam, dzie ahientaŭ niama, z metaj adciahnuć uvahu ad źniknieńnia Mielnikavaj».
Dyk chto nasamreč hety hieroj vajny?
Kaminski — heta ŭžo čaćviortaje proźvišča minčanina Vitala Valancinaviča Sidarava, syna kryminalnika, jaki pajšoŭ pa śladach baćki.
Zhodna z bazami Biełpoła, upieršyniu Vital Sidaraŭ ździejśniŭ złačynstva, kali jamu było 16 hod (u 1999 hodzie) — razam z padzielnikam skraŭ «Maskvič» u Zialonym Łuzie.
U 2007-m jon razam z tryma padzielnikami zalez u susiedskuju kvateru na vulicy Hamarnika ŭ Minsku i skraŭ adtul majomaść.
U 2008 hodzie pryjšoŭ pjanym u milicyju i zajaviŭ, što ŭ jaho skrali mašynu, jakaja była zastrachavanaja. Jaho sudzili pa spravie ab zaviedama chłuślivaj zajavie.
U tym ža 2008 hodzie byŭ spynieny pjany za styrnom.
Potym Sidaraŭ zamianiŭ proźvišča i staŭ Vitalem Andrasovičam.
U 2012 jon pakazaŭ daišniku padroblenaje paśviedčańnie kiroŭcy katehoryi «V» na imia Cymbareviča A.S.
Kaniečnie, nijakuju «baŭmanku» Sidaraŭ nie skančvaŭ (u jahonych Adnakłaśnikach dyk uvohule ukazanaje treciaje miesca vučoby — maskoŭski MHU). U 2006 hodzie, kali jon, pa jahonych słovach, «staŭ najlepšym jurystam Biełarusi», Sidaraŭ u realnaści pačaŭ atrymlivać hrošy ad «Łaryskora» jak milicejski stukač. Jamu vypłačvali zarobak da 2010 hoda. Jakuju mienavita rabotu vykonvaŭ hety dziejač u intaresach milicyi, nieviadoma. Mahčyma, chtości z čytačoŭ jaho apaznaje i ŭspomnić abstaviny.
Potym «miljanier» Sidaraŭ uładkavaŭsia sanitaram u Navinki. Paśla pajšoŭ u taksisty. Nijakim suzasnavalnikam taksi «Ałmaz» jon, naturalna, nie byŭ, pracavaŭ zvyčajnym kiroŭcam.
Z 2020 hoda Kaminski pracavaŭ u ipešnika, čyj zajaŭleny vid dziejnaści — «dziejnaść aŭtamabilnaha hruzavoha transpartu». Pracavaŭ, znoŭ ža — kiroŭcam.
Zarablaŭ Sidaraŭ ścipła, nijakich katedžaŭ z achovaj u Raŭbičach u jaho niama.
Za miežy Biełarusi Sidaraŭ-Andrasovič-Turaviec-Kaminski prynamsi da leta 2021-ha nikoli nie vyjazdžaŭ aficyjna — vyjezdy fiksujucca ŭ bazie «Pasažyrapatok» pa identyfikacyjnym numary, jaki zastajecca ŭ čałavieka nazaŭždy i nie karektujecca pry źmienie proźvišča. Tamu va Ukrainu jon trapiŭ paźniej za leta 2021-ha.
Ale ci vajavaŭ?
Takim čynam, ci vajavaŭ Kaminski, jak jon śćviardžaje, 10 hadoŭ va Ukrainie? Dy jašče ŭ biełaruskich padraździaleńniach?
«Nie pamiataju takoha», — skazaŭ pra Kaminskaha vieteran biełaruskaha padraździaleńnia ŭ składzie «Azova» Arciom «Hrot» Kuźmič na pytańnie, ci pryznaje jon u Kaminskim byłoha sasłužyŭca.
Ci byŭ Kaminski ŭ Pałku Kalinoŭskaha? Asabliva — ci vajavaŭ u Bachmucie?
«Pieršy raz baču takoha, navat nie čuŭ pazyŭnoha», — skazaŭ Alaksandr «Kuś» Kłačko, jaki pieražyŭ piekła Bachmuta.
«Nikoli takoha čałavieka nie bačyŭ i ź im nie pierasiakaŭsia. Na «bajavych» hetaja asoba nie była dakładna. Ale byli ludzi, jakija siadzieli na bazie — ich usich ja nie viedaju», — skazaŭ zasłužany bajec Pałka Kalinoŭskaha, minamiotčyk Jan «Biełarus» Mielnikaŭ, jaki taksama prajšoŭ Bachmut.
Adnak inšy čałaviek, jaki paprasiŭ nie ŭkazvać jahonaje imia, bo jon siabie nie afišuje, usio ž uspomniŭ Kaminskaha.
«Taki čałaviek byŭ. Ałkaholik. Zvolniŭsia praz tydzień paśla taho, jak aformiŭsia aficyjna», — skazaŭ nam hety bajec. Dadaŭšy, što, imavierna, Kaminski zvolniŭsia, kab nie vajavać.
Pavodle słoŭ samoha Kaminskaha, u jaho nie atrymałasia ŭkaranicca ŭ Internacyjanalny lehijon — padraździaleńnie z adnosna vialikaj kolkaściu biełarusaŭ u składzie.
U vyniku jon nibyta vajuje i staŭ znakamity svaimi podźvihami ŭ 49-m šturmavym bataljonie «Karpatśka Sič».
«Naša Niva» znajšła troch bajcoŭ hetaha padraździaleńnia, jakija vyjazdžajuć na bajavyja zadańni. Jany adkazali sa svaich akaŭntaŭ u instahramie.
«Vpieršie takoho baču», «Nie znaju takoho. Dažie i nie bačiv takoho», — adkazali dvoje ź ich. Treci nie paznaŭ z chodu, ale paabiacaŭ pacikavicca ŭ inšych bajcoŭ, kali vierniecca z zadańnia.
Całkam mahčyma, što ŭsio ž Kaminski prymaŭ udzieł u vajnie, ale jon dakładna nie toj, za kaho siabie vydaje.
Vyratavańnie ahienta Kaminskaha
Možna było b padumać, što hety čałaviek — jak i mnohija inšyja, — choć i majučy dyskredytujučuju historyju supracoŭnictva z orhanami, adumaŭsia paśla padziej 2020-2022 hoda i pajechaŭ kryvioj zahładžvać svaju vinu pierad paciarpiełymi ad režymu, jakomu danosiŭ.
Ale čamu ŭ takim razie, čałaviek, jaki vyrašyŭ ačyścić sumleńnie, zamiest pakajańnia i pryznańnia situacyi na chadu sačyniaje lehiendy, jakija nijak nie supadajuć nie tolki z danymi vykradzienych baz, ale i — šmat dzie — navat sa zdarovym sensam?
Kaža, što vajavaŭ u Bachmucie, a śviedki kažuć, što nie vajavaŭ. Kaža, što pracavaŭ jurystam, a nie pracavaŭ. Kaža, što mieŭ damy i hrošy, a nie mieŭ ničoha. Kaža, što nie milicejski ahient…
Takich adkryćciaŭ, kali b za miažoj znachodzili milicejskich stukačoŭ i hramadstvu pra heta stanaviłasia b viadoma, nasamreč nie tak šmat.
Naprykład, «Bajpoł» nazyvaŭ asobu ŭnutrykamiernaha raspracoŭščyka Viačasłava Bystrova, jaki ŭ Polščy abharnuŭsia bieł-čyrvona-biełym ściaham. Toj paśla sprabavaŭ adbialić siabie ŭ intervju Volzie Siamaška na staronkach «Radyjo Ŭnet».
Kali ž uskryŭsia pašpart prykryćcia muža Volhi Siamaški, to ratavać jaje reputacyju kinuŭsia mienavita Virus. Pryčym atrymałasia trahikamična — spačatku jon pierastaviŭ u svoj kanał rasśledavańnie «Našaj Nivy», adnak adrazu ž vydaliŭ dopis i paprasiŭ prabačeńnia ŭ padpisčykaŭ: maŭlaŭ, nie razabraŭsia.
Čytajcie: Fiodar Viktaravič i «Viktar Fiodaravič». Supracoŭnik «Varhiejminha» maje pašpart prykryćcia. Jaho žonka Volha Siamaška — viadomaja žurnalistka
Ciapier vykarystoŭvaje dla ratavańnia ahienta «Łaryskora» tuju ž viersiju, jakuju pieršasna ahučyła Siamaška ŭ situacyju za svaim mužam — pra nibyta skarektavanyja bazy. Nasamreč nivodnaj pamyłki va ŭzłamanaj pašpartnaj i inšych bazach nie było zafiksavana za ŭvieś čas karystańnia imi, dyj nie moža być — na toje jany i aficyjnyja dziaržaŭnyja sistemy.
U čym možna pavieryć milicyjskamu danosčyku Kaminskamu, dyk heta ŭ tym, što jamu ciapier daviadziecca tłumačyć asablivaści svajoj dziŭnaj bijahrafii ŭkrainskaj kontrvyviedcy.
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta29
Kamientary
Uražvaje toje, što ad jaho niechta naradziŭ dzicia. I hieny drennyja, i vyraścić nie zdoleje, jon sam u dahladzie maje patrebu.