Mielnikava prasiła, kab jaje apošniaje zapisanaje intervju vyjšła raniej za siaredzinu sakavika

U razmovie sa Źmitrom Łukašukom 21 lutaha Mielnikava abmierkavała aktualnyja padziei biełaruskaj palityki i situacyju vakoł Kaardynacyjnaj rady.

6 sakavika adbyłosia jaje apošniaje na hety momant źjaŭleńnie ŭ miedyjach ź vialikim intervju — udzieł u aŭtarskaj prahramie Źmitra Łukašuka «Ideja Ch». Adnak, jak raskazaŭ Svabodzie sam Źmicier, prahrama była zapisanaja značna raniej, 21 lutaha, padčas vizitu Mielnikavaj u varšaŭskuju studyju «Jeŭraradyjo».

«Sapraŭdy, apošniaje źjaŭleńnie Anžaliki Mielnikavaj u miedyjach ź vialikim intervju było ŭ mianie, — raskazvaje ŭ razmovie z Svabodaj Łukašuk. — Ale my zapisvali jaho nie 6 sakavika, a 21 lutaha.

Jana pryjšła da mianie ŭ studyju. U nas byŭ vialiki efir pra toje, što adbyvajecca ŭ Kaardynacyjnaj radzie, uvohule ŭ apazicyi. I adrazu ž u toj dzień paśla efiru my ź joj zapisali «Ideju Ch». I tut niuans taksama jość. Ja płanavaŭ, što hetaja pieradača vyjdzie ŭ siaredzinie sakavika. Tak było ŭ mianie ŭ płanie.

Ale Anžalika vielmi prasiła, kab heta było 6 sakavika. U mianie na hety dzień byŭ Aleh Harbuz, ale ja pahadziŭsia. Anžalika vielmi prasiła, kab razmova ź joj vyjšła raniej za siaredzinu sakavika».

Źmicier kaža, što ličyć hetuju prośbu prostym žadańniem hieraini intervju pabačyć siabie ŭ efiry raniej i nie schilny raźvivać kanśpirałahičnych teoryj. Pavodle jaho słoŭ, inicyjatyva razmovy i zapisu intervju išła ad samoj Mielnikavaj.

Źmicier dadaje, što, zychodziačy z padziej kanca sakavika, možna ŭhledzieć u hetym niešta zahadzia spłanavanaje, adnak jon usio ž miarkuje, što pavodziny Anžaliki Mielnikavaj nie varta ličyć niečym niezvyčajnym dla palityka, jaki maje žadańnie pryciahnuć uvahu da svajoj dziejnaści i tamu sam idzie na kantakt z žurnalistami. Z taho, što viadoma pra dziejnaść Anžaliki Mielnikavaj u lutym i sakaviku, vynikaje, što Źmicier Łukašuk moh być adnym z apošnich publičnych ludziej, chto kantaktavaŭ ź Mielnikavaj niepasredna pierad jaje adjezdam z Polščy.

«Jana pavodziłasia absalutna zvyčajna, — raskazvaje Źmicier. — Pryjšła z cudoŭnym nastrojem, šykoŭna vyhladała, skuranyja nahavicy. Šmat žartavała, pryčym vielmi vostra. Jana tak zaŭsiody siabie pavodziła, my ź joj i raniej šmat žartavali pamiž saboj. Časam na miažy fołu. Hetym razam jana była takoj samaj, ničym nie adroźnivałasia. Nijakaj pryhniečanaści, ničoha ja nie zaŭvažyŭ. Mahčyma, Anžalika była krychu stomlenaj tolki. Ale ja paličyŭ, što heta narmalna dla čałavieka, jaki stolki pracuje», — raskazaŭ žurnalist.

***

Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.

7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.

8 krasavika vice-śpikierka Kaardynacyjnaj rady Stanisłava Hlińnik, jakaja ciapier vykonvaje abaviazki śpikierki, paviedamiła, što 13 sakavika z akaŭnta Anžaliki Mielnikavaj byli spampavanyja fajły, da jakich jana mieła dostup u ramkach pracy Kaardynacyjnaj rady. Siarod ich — stratehičny płan, biudžet, unutranyja dakłady i inšyja apieracyjnyja materyjały pačynajučy ź lipienia 2024 hoda.

10 krasavika telekanału «Biełsat» stała viadoma, što z rachunka fondu Białoruś Liberty, zasnavanaha Anžalikaj Mielnikavaj, źniali hrošy. Zrabiła heta jana sama ci chto inšy, pakul nieviadoma. 

14 krasavika stała viadoma, što rasśledavańnie źniknieńnia Anžaliki Mielnikavaj u Polščy pieraviali na bolš vysoki ŭzrovień — zamiest Varšaŭskaj akruhovaj prakuratury hetym budzie zajmacca Nacyjanalnaja prakuratura. Na dumku śledčych, spravu pavinny rasśledavać prakurory, jakija zajmajucca najbolš važnymi spravami, u tym liku pytańniami špijanažu.

• 1
• 1
• 7
• 8
• 3
• 1
• 0
• 0