Mielnikava ličyłasia čałaviekam Paŭła Łatuški na čale Kaardynacyjnaj rady.
Pa infarmacyi «Našaj Nivy», Anžalika Mielnikava sama pakinuła terytoryju Polščy na samalocie. Mahčyma, jana vylecieła z terytoryi Jeŭrasajuza ŭ Vielikabrytaniju, paśla čaho jaje śled zhubiŭsia.
Pra svaje płany śpikierka KR nie papiaredziła nikoha ź siabroŭ.
U polskija pravaachoŭnyja orhany siabry padali zajavu ab źniknieńni Mielnikavaj.
«Infarmuju, što z 25 sakavika adsutničaje suviaź sa śpikierkaj Kaardynacyjnaj rady Biełarusi Anžalikaj Mielnikavaj. Pa najaŭnaj infarmacyi jana nie znachodzicca na terytoryi Polščy.
My spadziajemsia na lepšaje, ale razumiejem, što pieršyja asoby demakratyčnych sił Biełarusi źjaŭlajucca pryjarytetnymi celami śpiecsłužbaŭ režymaŭ u Biełarusi i Rasii.
Mnoj aficyjna padadzienaja zajava ŭ pravaachoŭnyja orhany Polščy ab źniknieńni śpikierki KR Anžaliki Mielnikavaj. Pa prośbie pravaachoŭnych orhanaŭ dadzienaja infarmacyja nie razhałošvałasia.
My budziem infarmavać ab raźvićci situacyi pa ŭzhadnieńni z pravaachoŭnymi orhanami Polščy», — napisaŭ Łatuška.
Razam z Anžalikaj Mielnikavaj źnikli i jaje dzieci, dočki 6 i 12 hadoŭ. Śpikierka KR žyła razam ź imi ŭ Varšavie. Dzie ciapier dzieci, taksama nieviadoma.
Były muž Anžaliki Mielnikavaj znachodzicca nie ŭ Polščy.
Pavodle papiaredniaj infarmacyi, Anžalika Mielnikava moža znachodzicca navat nie na terytoryi Jeŭrasajuza, paviedamiŭ sakratar Kaardynacyjnaj rady Ivan Kraŭcoŭ.
Sakrataryjat KR zajaŭlaje, što Mielnikava doŭhi čas nie vychodziła na suviaź, a ciapier jaje miescaznachodžańnie dakładna nieviadoma. KR prosić paviedamić u sakrataryjat infarmacyju pra apošni kantakt sa śpikierkaj KR i charaktar hetaha kantaktu.
Anžalika Mielnikava naradziłasia ŭ Niaśvižy. Skončyła Minski dziaržaŭny linhvistyčny ŭniviersitet i Biełaruski dziaržaŭny ekanamičny ŭniviersitet. Da 2018 hoda była namieśnicaj hienieralnaha dyrektara «Koka-Koła Bieŭrydžyz Biełaruś», paśla syšła ŭ dekretny adpačynak. U 2020 jaje dvojčy zatrymlivali na pratestach, u vyniku siamja źjechała ź Biełarusi.
Akramia śpikierstva ŭ KR Mielnikava pracuje z Paŭłam Łatuškam u Narodnym antykryzisnym upraŭleńni.
Apošniaje paviedamleńnie, jakoje atrymali ad śpikierki Anžaliki Mielnikavaj delehaty Kaardynacyjnaj rady, było pryśviečana jaje ciažkamu stanu zdaroŭja. Pakolki ŭsie dumali, što jana chvareje, to nichto žančynu asabliva i nie šukaŭ.
«U mianie ŭskładnieńnie paśla kavidu, i siońnia paćvierdziłasia zapaleńnie lohkich. Ciapier ja na ŭkołach i antybijotykach.
Kali ŭźniknie niešta sapraŭdy važnaje i terminovaje, ja zaŭsiody budu na suviazi i zmahu ŭdzielničać u nieadkładnych naradach / zvankach praz Zoom. Ale prašu pastavicca z razumieńniem — ja budu na balničnym bližejšyja dva tydni», — napisała ŭ svaim apošnim paviedamleńni ŭ čacie Kaardynacyjnaj rady Anžalika Mielnikava.
Jak vyjaviłasia, praź niejki čas Mielnikava vylecieła ź Jeŭrasajuza, nie papiaredziŭšy nikoha.
Mielnikava ličyłasia «čałaviekam Łatuški» na čale Kaardynacyjnaj rady.
«Pazvaniŭ ministr: Anžalika, kudy ty lezieš?» Byłaja top «Koka-Koły» raskazvaje, jak stała śpikierkaj Kaardynacyjnaj rady
Chto stanie novym śpikieram Kaardynacyjnaj rady? Imia favaryta ŭžo viadomaje
«Kolki palitviaźniaŭ vyzvaliŭ Mašenski?!» Piatruchin biŭsia suprać usioj Kaardynacyjnaj rady, ale pieramohu tak i nie zdabyŭ
Byłaja vice-śpikierka Kaardynacyjnaj rady Volha Pavuk stała nastaŭnicaj u litoŭskaj škole
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta36
Kamientary