«Soramna za našu miedycynu». Ciažarnaja biełaruska aburyłasia prośbaj radzilni
Biełaruska paskardziłasia ŭ sacsietkach, što joj zahadali prynieści na płatnyja rody ceły nabor ź miedyčnych tavaraŭ.
Karystalnica pad nikam tania_shpk apublikavała ŭ Threads post pra śpis, jaki joj uručyli ŭ radzilni, kudy źbirajecca žančyna. Chacia jana idzie na płatnyja rody, joj treba prynieści z saboj navat prostyja raschodnyja materyjały:
«Mnie zrabiłasia soramna za našu miedycynu. Čamu ja pavinna ŭ radzilniu kuplać jašče katetar i płastyr? Dzie biudžet? Chočacca prosta zadać hetaje pytańnie vyšejšym adkaznym asobam, u vas pavinna być zakup na heta ŭsio.
I binha, apošni punkt — ja taksama pavinna prynieści svoj pakiet dla paśleda. Dobra, ja akušerka i viedaju pamiery paśleda, ale niechta ž nie ŭ kursie. Heta hańba. Dobra, kali b ja chacieła asablivy katetar — ok, kuplaj. Heta takija rečy, na jakija nu ŭžo dakładna pavinny być biudžet i jakija zaŭsiody pavinny być u najaŭnaści!»
Žančyna taksama apublikavała fota z tym samym śpisam miedyčnych tavaraŭ, jakija joj treba nabyć na płatnyja rody. Akramia chałata i tualetnaj papiery, biełaruska musić prynieści z saboj adnarazovy stanok dla haleńnia i adnarazovyja pialonki, a taksama paviazku-płastyr dla kiesaravaha siačeńnia, zialony ŭnutryvienny katetar i navat paviazku-płastyr pad katetar. Jašče žančynu prosiać uziać z saboj kubak i pakiet dla paśleda.
U kamientarach biełaruska ŭdakładniaje, što heta dziejecca ŭ Baranavičach. Jana dapuskaje, što kali pryjdzie zaklučać pahadnieńnie datyčna płatnych rodaŭ, niešta źmienicca i košt raschodnikaŭ usio ž budzie ŭklučany ŭ ahulny košt rodaŭ.
Inšyja karystalniki zhadali svaje prykłady ź biełaruskaj miedycyny.
«Ja pamiataju, što lažała ŭ balnicy ŭ 2015 hodzie. Minsk. Paprasili pryvieźci binty, vatu, tabletki. Mnie baćki prynosili darahija niamieckija preparaty (dziadula dasyłaŭ). U ich navat nie było zialonki, mnie asabista starejšaja miedsiastra pakazvała pustyja palicy. Niejak tak. I jašče kroŭ z palca brali barysaŭskimi kałami (žeść, ja dahetul uzdryhvaju)».
«Naradžała ŭ 2018 i 2022 hadach u Homieli. Zdajecca, płastyr dla kiesarava dziaŭčaty kuplali (u mianie naturalnyja rody), ale pakiety dla paśleda i katetar dakładna nie byli ŭ śpisie».
«Mnie nie spadabałasia, što ź mianie ŭziali hrošy za adzieńnie dla rodaŭ, maŭlaŭ, saročka i niešta tam jašče. Prynieśli prosta papierku na apłatu paśla rodaŭ, a pa fakcie ničoha nie vydali. Ciapier, kaniečnie, pahutaryła b ź imi, ale tady było nie da taho. Brest».
«Adzinaje, što sa svajho addavała — heta padhuźniki ŭ dziciačaje adździaleńnie na zamienu tym, što vykarystoŭvali dla dziciaci, pakul ja ŭ pałacie nazirańnia lažała. Ale heta całkam možna zrazumieć i nie škada».
«Naša Niva» — bastyjon biełaruščyny
PADTRYMAĆU Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta29
Kamientary