«Суседзяў турбуе толькі аўтарынак». Беларус з Тэхаса расказаў пра настроі ў штаце, дзе «кожны сабака за Трампа»
Айцішнік Міхаіл жыве і працуе там, дзе «кожны сабака за Трампа». Ён і сам быў за Трампа. Devby.io пагаварыў з Міхаілам пра тое, як ён і іншыя тэхасцы — калегі і суседзі — рэагуюць на прэзідэнцкія рашэнні свайго абранніка.
«Ад некаторых чуў, што Трамп не такі ўжо і добры, але «галасаваць няма за каго»
— Я наогул і сам быў за Трампа да выбараў — мне падабалася яго праграма. Але галасаваў за Камалу Харыс, бо мой сябар яшчэ з [часоў] БДУІР ледзь не ультыматум паставіў: «Я з табой перастану мець зносіны, калі аддасі голас за Трампа». Ну, я вырашыў: унясу разнастайнасць — разбаўлю сваім голасам «чырвоную» тэхаскую скарбонку.
Тэхас жа заўсёды быў за рэспубліканцаў. Я жыў у Каліфорніі і ў Нью-Ёрку, аб’ехаў 23 штаты — але больш «чырвонага» штата і ўявіць нельга: тут усе за Трампа.
Я з многімі тут размаўляў перад выбарамі: чаму не Харыс. І ўсе казалі: «Па-першае, Трамп — мужык. А па-другое, хрэн за рэдзьку не саладзейшы — не будзе Камала лепшая, чым Байдэн». Ад некаторых людзей чуў, што і Трамп не такі ўжо і добры, але «галасаваць няма за каго».
Я б сам прагаласаваў за губернатара штата Фларыда Рона Дэсанціса — ён і маладзейшы за Трампа, і жыхары Фларыды яго вельмі хваляць: «класны мэр, шмат зрабіў», — але ён нешта зліўся.
Ці працягваюць хлопцы, што абедзвюма рукамі былі за Трампа, тапіць за яго і цяпер? Так, вядома. Шмат каму падабаецца ягоная палітыка па барацьбе з мігрантамі. Суседзі кажуць: «Усё правільна ён робіць! Ён верне амерыканцам і тым, хто тут легальна, працоўныя месцы» (увогуле ўсе гэтыя словы пра працоўныя месцы — гэта ж бальзам на душу амерыканца).
Я і сам сутыкаўся з праблемай пошуку хаця б якой працы, калі толькі прыехаў у Нью-Ёрк. Мігранты ў асноўным кучкуюцца ў «вялікім яблыку»: засяляюцца па 15 чалавек у студыю, потым прыходзяць на будоўлю, дзе работнікам плацяць па $15 за гадзіну, і кажуць: «А мы за $7 будзем працаваць», — і ўсе, хто працаваў там раней, выпраўляюцца на мароз.
Прычым працуюць тыя ж мексіканцы, напрыклад, не як беларусы, — а о-го-го: не баяцца ні пякучага сонца, ні снегу і ветру — гатовыя рабіць 24/7, як рабы.
У ІТ, дарэчы, тое ж самае: тут мігранты (праўда, не мексіканцы, а індусы) таксама дэмпінгуюць.
«У СМІ пішуць, што праблема закране тысячы індыйцаў — паедуць дадому»
У ЗША палітыку з калегамі на працы абмяркоўваць не прынята — гэта дрэнны тон. Можаш на кухні з жонкай Трампу і Байдэну костачкі перамываць або з сябрам у бары. А на працы — толькі працоўныя пытанні. Хоць у мяне ёсць калега, з якім мы даўно і блізка сябруем — дык з ім мы можам у курылцы пра што заўгодна паразмаўляць: і пра Трампа, і пра Маска.
Я пытаўся ў калег на наступны дзень пасля выбараў: «Ты за каго галасаваў?» А яны: «Сакрэт» — і ні слова болей. Потым ужо многіх «даціснуў» — тэт-а-тэт, амаль усе былі за Трампа.
Цяпер Трамп сваімі мытамі абваліў фондавы рынак ЗША, але нашы кажуць: «Прынамсі, ён хоць нешта робіць».
У нас у камандзе два індыйцы: студэнцкія візы ў іх скончыліся, а візы H-1B, якія разыгрываюцца ў латарэі, яны не выйгралі. Кампанія заплаціла за кожнага з іх па $14 тысяч — і ім далі дазвол на працу на год. Вось цяпер яны і трасуцца: як скончыцца тэрмін дзеяння дазволу, ім могуць і не падоўжыць іх статус у ЗША.
Адміністрацыя Трампа ўзмацніла правілы выдачы віз H-1B, скасавала некалькі органаў па пытаннях грамадзянства і міграцыі і распусціла амбудсменаў, якія дапамагалі мігрантам атрымліваць візы H-1B і абаранялі іх у спрэчных сітуацыях. У СМІ пішуць, што праблема закране тысячы індыйцаў — збяруць манаткі і паедуць дадому. А яны ж усе ў ІТ. Мне расказвалі, што ім з дзяцінства кажуць: «Вучы Java — паедзеш у ЗША», — і яны ідуць у праграмісты: і здольныя, і не вельмі — усе. Думаю, адток будзе немалы, калі камбайн Трампа па іх пройдзецца.
Магчыма, мне гэта на руку: калі з’явіцца канкурэнцыя за кандыдатаў на месцы — вырастуць заробкі. А можа і не — проста кампаніі пачнуць наймаць проста з Індыі на аддаленую працу. У нас ёсць такія супрацоўнікі, і плацяць ім не $7 тысяч, а $2 тысячы (і за гэтыя грошы яны гатовыя горы звярнуць).
Пакуль з наймам усё сумна: кампаніі прыпынілі хайрынг. Раней мне ад рэкруцёраў паступала па 10—20 званкоў у дзень, а цяпер — у найлепшым выпадку адзін. Нядаўна я адгукнуўся на 200 вакансій — і толькі з адной мне ператэлефанавалі.
«У кожнага тэхасца ў доме па 15—20 адзінак зброі, пазбавіць яго іх — гэта як пакінуць голым»
У Тэхасе з мігрантамі асабліва не змагаюцца — у нас усё спакойна. У Фларыдзе, я чуў, узяліся сур’ёзна: праводзяць ператрусы на вуліцах, дакументы правяраюць у кожнага трэцяга.
У нас жа асноўная сацсетка — Facebook, і вось там столькі розных гісторый: людзі пражылі па 30 гадоў у ЗША, іх ледзь не дэпартавалі назад на радзіму — адвакаты ледзь адбілі.
Пратэстаў у нас у Тэхасе няма — тут, здаецца, ціха. Людзям трэба працаваць! Ні ў каго няма часу стаяць на вуліцах і крычаць: «Прэч Трампа!» Ды і не той гэта штат, каб тут актыўна пратэставалі.
Усе памятаюць, што дэмакраты хацелі скасаваць другую папраўку да Канстытуцыі — пра права захоўваць і насіць зброю. А мясцовыя жыхары супраць гэтага. У кожнага тэхасца ў хаце па 15—20 адзінак зброі, пазбавіць яго іх — гэта як пакінуць яго голым сярод небяспечнага раёна. А Трамп на «святое святых» не пасягае, хоць у яго і стралялі.
У мяне, дарэчы, таксама 13 адзінак зброі: ад аўтамата Калашнікава і вінтоўкі AR-15 да некалькіх пісталетаў — і я не хацеў бы аднойчы ўсё гэта здаць і застацца з ножыкам.
Не, ужываць зброю супраць кагосьці ці проста пагражаць ёю мне не даводзілася, гэта хутчэй хобі: падабаецца схадзіць у цір — пастраляць на 5, 10, 15, 20 метраў. Плюс гэта як канструктар: набыў вінтоўку — значыць, патрэбны да яе перахаднік, потым снайперскі прыцэл…
У Тэхасе роўны рэльеф — сумна, гэта не Каліфорнія: хочаш — у горы на хайкінг, хочаш — да акіяну шашлыкі смажыць (там на пляжы мангалы праз кожныя 5 метраў). Таму з даўно прынятых тут забаваў — толькі стральба.
«Каля офіса тыдзень стаялі грузавікі з расцяжкамі: «Ілан Маск, ты не адмыешся ад Трампа»
Да Маска тут ставяцца нейтральна. Па Штатах пракацілася хваля падпалаў аўтамабіляў — грамілі машыны Tesla, але ў нас у Тэхасе я не чуў ні пра адзін падобны выпадак [у дылерскім цэнтры Tesla ў Осціне 24 сакавіка выявілі некалькі запальвальных прылад, ніхто не пацярпеў. — Заўв. рэд.].
Дарэчы, калі я працаваў у Tesla у 2015 годзе, паркінг у Пала-Альта на 2000 месцаў заўсёды быў забіты да краёў, — але машын Tesla там было ад сілы дзясятак. А вось у Тэхасе зараз Tesla нямала: на кожным скрыжаванні сустрэнеш дзве-тры — у асноўным Model 3 і Model Y.
І яшчэ пацешнае: у Tesla я працаваў якраз у той год, калі Трамп упершыню стаў прэзідэнтам ЗША. Каля нашага офіса тады амаль тыдзень стаялі вялізныя грузавікі з расцяжкамі: «Ілан Маск, ты не адмыешся ад Трампа», — з-за таго, што ён падтрымаў Дональда.
Тады Маск яшчэ напісаў ліст усёй камандзе: маўляў, хлопцы, у нас у Tesla фінансавыя праблемы, калі кампанія разваліцца — прабачце, браты, давядзецца ўсіх звольніць. Але потым усё нармалізавалася, відаць, знайшоў дзесьці інвестыцыі.
А яшчэ пазней нашу канкрэтную каманду скарацілі: мяне і ўсіх астатніх кантрактараў звольнілі, а потым узяліся за тых, хто быў у штаце на фул-тайм.
«Паліцэйскія вырашылі, што гэта наркотыкі. Таблеткі адправілі на аналіз, а мяне — на допыт»
Я ў Тэхасе адчуваю сябе свабодней, чым у той жа Каліфорніі — некалькі гадоў жыў у Крамянёвай даліне.
Там я неяк ішоў ноччу з карпаратыву (аўтобусы ўжо не хадзілі) — мяне спыніла паліцыя, запакавала і завезла ў «малпоўнік». Яны абшукалі мяне, знайшлі таблеткі, а на ўпакоўцы — надпіс па-руску.
Мне тады паставілі імпланты — і я прымаў абязбольваючы прэпарат, які цесць з цешчай прывезлі з Беларусі. Паліцэйскія, зразумела, мне не паверылі — вырашылі, што гэта наркотыкі. Завезлі мяне ва ўчастак. Таблеткі адправілі на аналіз, а мяне — на допыт.
Я патлумачыў: так і так, гэта абязбольваючае, сваякі прывезлі. Пакуль з візамі было прасцей, цесць з цешчай прыязджалі кожны год, і я іх прасіў: вазьміце абязбольваючае і антыбіётыкі — тут іх толькі па рэцэпце прадаюць, а анальгіну ўвогуле не знайсці ні ў адной аптэцы.
Вось такая начная прыгода. А ў Тэхасе са мной нічога падобнага не здаралася.
«З-за мытаў зараз пасыплецца аўтарынак. У Тэхасе кожны дзясяты ездзіць на Range Rover»
З-за чаго турбуюцца суседзі: з-за мытаў, якія ўвёў Трамп, зараз пасыплецца аўтарынак. Тут, у Тэхасе, кожны дзясяты ездзіць на Range Rover, многія аддаюць перавагу Toyota — а як цяпер абслугоўваць еўрапейскія і японскія аўто? Будзе балюча!
Так, можна купляць амерыканскія машыны, але цэны на мясцовыя вышэйшыя — я не ведаю, чаму. Я неяк прыехаў на General Motors, і там была машына па класе як Honda Pilot — але каштавала ў 2 разы даражэй. І я такі: «Чаго?» А мне тлумачаць: хочаш аўто ад амерыканскага вытворцы — трэба плаціць. Альбо купляй «бэушку» — але гэта кот у мяху.
Тут у Тэхасе ж адлегласці такія — без надзейнай машыны ніяк. Да Форт-Уэрта 60 міль — гэта 100 км. А калі табе кожны дзень туды трэба ездзіць на працу — уяўляеце, колькі за месяц прабегу набягае! Кіламетражы тут шалёныя. Зараз узгадваеш, як у Беларусі ездзіў на працу 13 км у адзін бок — і думаеш: дык гэта ж увогуле ні пра што!
Яйкі падаражэлі? Не, я такога не заўважыў! Так, у блогераў бачыў відэа, але ў нас у крамах кошт не змяніўся: мы набываем вялікімі скрынкамі — 4 паддоны па 12 тузінаў яек, разам 567 штук. Каштуе скрынка $29 — на сям’ю з 5 чалавек хапае больш чым на месяц.
А ўвогуле, цэны ў нас часта мяняюцца. Выгадна прыходзіць у нядзелю. У Walmart у гэтыя дні на тавар, тэрмін прыдатнасці якога ўжо падыходзіць да канца, вешаюць жоўтыя цэннікі — і зніжаюць кошт ў 2 разы, а то і больш. Я купляў вэнджанага ласося там за $2, а ў іншыя дні яны каштуюць $7—8. Снежнага краба з Аляскі можна ўзяць за $11, а так яго кошт — $24.
Цэны на бензін мяняюцца ад $2 да $3,5 за галон. Але пры Трампе патаннеў — зараз $2,5 каштуе.
Цяпер чытаюць
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа24
Каментары
А вось гэта зусім нешта з лагеру амерыканскіх неверагодных “ мой сябар яшчэ з [часоў] БДУІР ледзь не ультыматум паставіў: «Я з табой перастану мець зносіны, калі аддасі голас за Трампа». ”
І пасля гэтага нехта будзе казаць пра цэнзуру Трампа і пра тое, што ён нібы душыць сввбоду. У люстэрка спачатку паглядзіце, шаноўныя.