Пінжак з джынсамі, хоць і выглядае як просты і надзейны выбар, можа лёгка стаць няўдалым, калі не ўлічыць важных дэталяў.
Некалькімі парадаў у каментары The Wall Street Journal даў заснавальнік парыжскага атэлье Husbands Нікаля Габар.
Пінжак з джынсамі — гэта ўніверсальны вобраз, які можна зрабіць як расслабленым і трохі дзёрзкім, так і больш элегантным. Галоўнае — выбраць пасланне, якое вы хочаце перадаць сваім стылем.
З джынсамі спалучаюцца пінжакі з твіду, аксаміту, вельвету
Насіць офісны пінжак з джынсамі — гэта як падаваць ікру на папяровай талерцы: усё абсалютна не спалучаецца, кажа Габар. Гладкая тканіна пінжака не падыходзіць да грубага дэніму. Зусім іншае, калі пінжак тэкстурны.
З джынсамі ідэальна спалучаецца пінжак з твіду, аксаміту, вельвету.
Пінжакі якога крою і тэкстуры прыгожа глядзяцца з джынсамі
Самы просты і стыльны выбар — цёмна-сіні пінжак з тканіны, вырабленай па тэхналогіі хапсэк (пры такім перапляценні нітак тканіна не мнецца і атрымліваецца лёгкай). Злёгку няроўная тэкстура такога пінжака добра спалучаецца з дэнімам, а цёмна-сіні колер падыдзе як для светлых, так і для цёмных джынсаў.
Таксама варта звярнуць увагу на пінжакі з латуневымі гузікамі залацістага адцення — гэта надасць вобразу завершанасць, падкрэсліваючы, што пінжак — самастойная рэч, а не частка касцюма.
Па словах Габара, пад джынсы ідэальна падыдзе падоўжаны пінжак. Ён павінен перакрываць сцёгны ці злёгку апускацца ніжэй за іх. Пінжак павінен мець выразна выяўленыя плечы, шырокія лацканы і накладныя кішэні.
Выбірайце пад пінжак джынсы з прамым кроем
Што да джынсаў, то стылісты рэкамендуюць пад пінжак мадэлі з прамым кроем і класічным стылем (тыпу Levi's 501). Джынсы павінны быць з высокай ці сярэдняй пасадкай, але ніяк не з нізкай. Інакш вобраз будзе выглядаць негарманічна.
Роўны і акуратны сілуэт джынсаў прамога крою стварае больш строгі і структураваны вобраз. Завужаныя джынсы робяць фігуру цяжкай зверху, а мешкаватыя дадаюць неахайнасці.
Якія кашулі пасуюць пад джынсы з пінжаком
Для завяршэння вобразу падыдзе стыльны гальштук або элегантная вадалазка. Таксама выдатна глядзіцца не да канца зашпіленая зверху кашуля, белая футболка альбо джынсавая кашуля ў стылі вестэрн.
Габар раіць успрымаць пінжак амаль як паліто: яго можна зняць, але вобраз павінен заставацца завершаным.
Які абутак пасуе пад стыль джынсаў з пінжаком
Па словах стыліста, ёсць некалькі варыянтаў абутку, які пасуе да пінжака з джынсамі ў залежнасці ад стылю.
Калі джынсы з высокай пасадкай, добрым выбарам будуць чаравікі, напрыклад, чэлсі ці каўбойскія, якія надаюць вобразу элегантнасць і завершанасць.
Лоферы нададуць вобразу расслабленасці і нязмушанасці, асабліва калі яны карычневыя і спалучаюцца з папругай з аналагічным адценнем і тэкстурай. Для больш вулічнага стылю падыдуць кеды, якія дадаюць лёгкасці і нядбайнасці, ствараючы больш маладзёжны і свабодны вобраз.
Цяпер чытаюць
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа7
Каментары