У кафэ ў Брэсце наведвальнікі сустрэлі мыш. А яшчэ адзін непрыемны сюрпрыз чакаў пад расцягаем
У Брэсце пара вырашыла схадзіць на «Гастрафэст» у кафэ. Там іх чакаў не вельмі прыемны сюрпрыз (і нават не адзін). Але карыстальнікі тыктоку аднесліся да сітуацыі з гумарам.
Цяпер у Беларусі праходзіць чарговы «Гастрафэст». Кафэ-ўдзельнікі прапаноўваюць наведвальнікам розныя сэты па аднолькавым кошце — 43 рублі.
У Брэсце пара вырашыла пачаставацца стравамі ў кафэ «Няма пытанняў». Там у сэт уваходзіць расцягай маскоўскі, салата «Мімоза», грыбны суп, катлеты «Пажарскія» з бульбяным пюрэ, а на дэсерт — шакаладная каўбаса. Гучыць смачна, а на фота выглядае яшчэ лепш. Паведамляецца, што агульная вага страў — 1170 грам.
Але ў кафэ наведвальнікі нечакана сустрэлі яшчэ аднаго гурмана — маленькую мыш. Тая бегала побач са сцяной, а потым знікла за адной з цаглін — відавочна, там у яе норка.
— Не баішся? — пытаецца мужчынскі голас за кадрам.
— Канешне, баюся! — з ноткамі трагізму адказвае жаночы. — Ашалець!
Незапланаваная сустрэча аказалася не адзіным непрыемным сюрпрызам. Аўтарка відэа паказала, што ў яе талерцы пад тым самым расцягаем маскоўскім апынуліся некалькі валасоў.
Менш чым за суткі відэа набрала ў тыктоку больш за 255 тысяч праглядаў і каля 6 тысяч лайкаў. Але шмат хто з каментатараў паставіўся да сітуацыі з гумарам.
Жартавалі, што пара сустрэла Рэмі — героя папулярнага анімацыйнага фільма: «Мультфільм «Рататуй» не глядзелі? Дык паглядзіце і супакойцеся!», «Гэта шэф-кухар выйшаў спытаць, ці ўсё вам спадабалася».
Хтосьці падтрымаў ідэю, што мыш сапраўды працаўладкаваная ў кафэ: «Гэта Барыс. Ён працуе там самелье збожжавай прадукцыі», «Дык гэта штатная адзінка. Дэгустатар-аніматар».
Нехта паспрабаваў знайсці апраўданне кафэ: «Аднапавярховы будынак, былая «заброшка», быццам бы мыш. Можна зразумець, гэта не прусак. Але валасы пад булкай — апошняе, што я хацеў бы бачыць».
Былі і тыя, хто пашкадаваў мыш і выказаў спадзяванне, што грызуна пакармілі. А самыя вынаходлівыя пабачылі ідэю для стартапа: «Мыш-кафэ. Ці Мышкакафэ. Каму як падабаецца».
Вядомая воданапорная вежа Мінска хутка адчыніць дзверы. Як будынак выглядае знутры зараз
«Я хачу пазбавіцца ўсіх кліентаў з ноўтбукамі!»: уладальнік сталічнай кавярні падзяліўся болем
«Усе атрымалі кухталёў за афармленне». У Брэсце забаранілі Хэлоўін ва ўстановах грамадскага харчавання
Тайваньскі напой, які спачатку не спадабаўся беларусам, стаў папулярным у нас праз 10 гадоў
Цяпер чытаюць
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа7
Каментары