Прэзідэнт Сербіі Аляксандр Вучыч сёння пагаварыў з Уладзімірам Пуціным. Падставай для размовы стала 80-годдзе з Дня вызвалення Бялграда.
Пра гэта Вучыч расказаў у сябе ў інстаграме.
«Я толькі што скончыў размову з прэзідэнтам Расійскай Федэрацыі Уладзімірам Пуціным. Амаль два з паловай года мы не размаўлялі. У нас была добрая, адкрытая, доўгая і змястоўная размова», — сказаў Вучыч у відэа.
Паводле слоў Вучыча, яны абмяняліся з Пуціным думкамі па ўсіх важных двухбаковых пытаннях, у тым ліку эканамічных. Так, напрыклад, Вучыч падзякаваў Пуціну, што ён гэтай зімой забяспечыць Сербію дастатковай колькасцю газу.
Прэс-служба Крамля таксама пракаментавала размову. Паводле паведамлення Крамля, прэзідэнты абмеркавалі сітуацыю вакол Украіны, а Пуцін даў ацэнку ходу «спецыяльнай ваеннай аперацыі».
«З абодвух бакоў выказана задавальненне ўзроўнем двухбаковых адносін, якія грунтуюцца на духоўнай, культурнай і гістарычнай супольнасці, адзінстве ацэнак мінулага і сучаснасці», — гаворыцца ў паведамленні Крамля.
Апошняя тэлефонная размова Вучыча з Пуціным была 29 мая 2022 года. Сустракаліся яны ў лістападзе 2021 года.
Цяпер чытаюць
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа29
Каментары