На ўваходзе ў «Верадоўскі бор» паставілі незвычайны памятны знак, які будзе «адпрацоўваць» за грахі свайго мінулага.
Заказнік мясцовага значэння «Верадоўскі бор» заснаваны ў ваколіцах вёскі Верадова на тэрыторыі Маладзечанскага лясгаса з мэтай падтрымання і захавання біялагічнай і ландшафтнай разнастайнасці прыроднага комплексу і прылеглых тэрыторый. Яго стварэнню папярэднічала вялікая праца неабыякавых людзей.
Ахоўнай тэрыторыя плошчай 161,44 га была абвешчана рашэннем Маладзечанскага райвыканкама яшчэ 7 мая 2024 года.
На тэрыторыі заказніка размешчаны два ўчасткі агульнай плошчай 7,4 га, якія адносяцца да тыповых і рэдкіх біятопаў, характэрных для заходняй тайгі. На плошчы 34,9 га растуць каштоўныя высока-ўзроставыя лясы.
90% тэрыторыі заказніка, пакрытай лесам, займаюць хваёвыя лясы, для якіх характэрнае панаванне тайговых відаў раслін.
Тут шырока прадстаўлены лясныя і лугава-ўзлесныя віды тайговага тыпу. Выяўлена месца, дзе расце сон раскрыты (Pulsatilla patens), дзікарослая расліна, уключаная ў Чырвоную кнігу Беларусі. Акрамя таго тут заўважаны 9 іншых уразлівых відаў раслін, якія патрабуюць аховы: пералеска высакародная, першацвет веснавы, званочак персікалісты, кольнік коласападобны, гняздоўнік звычайны, гудаера паўзучая, чараўнік двухлісты, пальчатакарэннік Фукса і зуброўка паўднёвая.
З жывёльнага свету ў чарнічным бярэзніку выяўлены барсук (Meles meles), таксама ўнесены ў Чырвоную кнігу.
Ініцыятыва стварыць заказнік належыць Маладзечанскаму лясгасу, а падрыхтаваць дакументы дапамог начальнік раённай прыроднай інспекцыі Уладзіслаў Чарноў. Абследаванне флоры і фаўны і экалагічнае абгрунтаванне зрабіў Інстытут эксперыментальнай батанікі імя В. Ф. Купрэвіча Нацыянальнай акадэміі навук Беларусі.
Чарноў прывёз з Раёўкі двухтонны каменны жоран, што застаўся ад былой кардоннай фабрыкі. Цяпер жоран стаў незвычайным мемарыяльным знакам на ўваходзе ў заказнік.
«А што? Кардон жа робяць з драўніны. Колькі дрэў перамалоў гэты жоран за шматлікія гады? Вось цяпер хай аддае даўгі. Пагрузілі яго пад'ёмным кранам і прывезлі сюды», — патлумачыў ідэю Чарноў.
На ўрачыстае адкрыццё заказніка «Верадоўскі бор», якое адбылося 12 ліпеня, прыехалі спецыялісты з Інстытута эксперыментальнай батанікі і Інстытута лесу НАН Беларусі.
Паводле слоў дырэктары Інстытута эксперыментальнай батанікі Дзмітрыя Грумо, «Верадоўскі бор» гэта «філіял» паўднёвай тайгі на тэрыторыі Мінскай вобласці. Расліннасць тут вельмі разнастайная, а глеба ўрадлівая.
У 2012 годзе батанічным помнікам прыроды быў абвешчаны таксама Верадоўскі дэндрапарк. Дэндрапарк каля заходняга ўскрайку вёскі Верадова заклалі ў 2000 годзе на плошчы 6,2 гектараў. Тут расце больш за 600 дрэваў і кустарнікаў, якія прадстаўляюць 80 відаў прадстаўнікоў мясцовай і іншаземнай флоры.
Цяпер чытаюць
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа8
Каментары