Prypynieńnie polskim uradam prava na padaču chadajnictvaŭ ab mižnarodnaj abaronie na miažy ź Biełaruśsiu i inšyja miery dali efiekt. Kolkaść sprobaŭ parušeńnia miažy mihrantami źmienšyłasia.
Adnak u MUS Polščy čakajuć pravakacyj na miažy ź biełaruskaha boku. Pra heta ŭ efiry TVPinfo zajaviŭ namieśnik ministra ŭnutranych spraŭ i administracyi Maciej Duščyk, piša Reform.news.
Pavodle jaho słoŭ, u sakaviku z nadychodam viasny na miažy fiksavałasia ad 100 da 200 sprobaŭ parušeńnia miažy. Adnak paśla zaviaršeńnia mierapryjemstvaŭ pa ŭmacavańni pamiežnaha zaharožańnia, u tym liku madernizacyi srodkaŭ nazirańnia, uviadzieńnia bufiernaj zony i prypynieńnia prava padačy chadajnictva ab prytułku kolkaść sprobaŭ parušeńnia miažy skaraciłasia.
«Kali my paraŭnajem hety pieryjad u 2025 i 2024 hodzie, to bačny hihancki prahres. U nas jość umacavany płot, bufiernaja zona, infarmacyjnaja kampanija ŭ krainach pachodžańnia i tranzitu, prypynieńnie prava na prytułku — usio heta pryviało da taho, što my majem ad 10 da 20 sprobaŭ parušeńnia, ale heta značna mienš, čym raniej.
I što vielmi važna, za try dni — subota, niadziela, paniadziełak — u nas stoadsotkavaja efiektyŭnaść zatrymańniaŭ. Nichto nie pierajšoŭ miažu, ale sproby praciahvajucca», — skazaŭ jon.
Namieśnik ministra adznačyŭ, što polski bok pry hetym razhladaje lubyja scenary, u tym liku novyja pravakacyi na miažy.
«Kali Łukašenka, jaki pryvioz hetych ludziej da siabie, siońnia maje ź imi prablemy, bo jany nie mohuć pierajści miažu, vierahodna, zachoča zrabić jašče niejkija pravakacyi, adnu, druhuju ci treciuju, vielmi mahčyma navat z užyvańniem hvałtu da hetych mihrantaŭ. Ale my viedajem, jak reahavać na takuju situacyju, viedajem, što Łukašenka choča abvastryć hety kanflikt. Zaraz jon bjecca ab ścianu, bo płot uzmocnieny. Usie hetyja dziejańni, jakija my raspačali i jakija siońnia dajuć vynik, aznačajuć, što jon i jaho rasčaravańnie rastuć», — skazaŭ jon.
Duščyk nie staŭ kankretyzavać, jakich mienavita dziejańniaŭ ź biełaruskaha boku čakajuć u MUS. Pavodle jaho słoŭ, heta mohuć być paškodžańni płota, ataki na punkt propusku.
«Davajcie ŭspomnim, što adbyłosia niekalki dzion tamu. Polskija kamiery zafiksavali napad biełaruskaha słužačaha z kamianiami na polskich pamiežnikaŭ. Ministr Siemoniak vielmi jasna skazaŭ, što pravakacyi buduć rascenieny jak varožyja, jak varožy akt suprać nas, suprać Polščy», — dadaŭ namieśnik ministra.
U namieśnika ministra taksama spytali pra sproby pierapravy mihrantaŭ praz pamiežny Buh, ź jakoha byli vyniaty cieły dvuch čałaviek. Pavodle Duščyka, mihrantaŭ šturchnuli ŭ vadu biełaruskija słužačyja.
«My viedajem, što heta ludzi, jakija, vierahodna, pavodle našaj infarmacyi, manitorynhu situacyi ŭ Biełarusi, heta byli ludzi, jakich šturchnuli ŭ vadu biełaruskija słužby, chutčej za ŭsio, u siaredzinie sakavika», — skazaŭ jon.
«Tam było bolš za 10 čałaviek, ich šturchnuli ŭ vadu. Niekatorych ź ich udałosia vyratavać. Polskija pamiežniki, bačačy tych, chto tonie, viadoma, akazali im dapamohu. Vierahodna, nie ŭsim, nie zaŭsiody heta ŭdajecca.
Niekatoryja, vierahodna, nie ŭmieli płavać i, padobna, patanuli jašče na biełaruskaj terytoryi, bo cieły ŭspłyli na našaj terytoryi. Čamu ŭspłyli zaraz? Bo trochi źmianiłasia płyń raki, było šmat daždžu, uzrovień vady padniaŭsia i cieły ŭspłyli. Chaciełasia b, kab ich bolš nie było. Ale, na žal, heta jašče adzin prykład eskałacyi z druhoha boku», — dadaŭ jon.
Jon nie vyklučyŭ, što cieły mahli ŭspłyć i na biełaruskaj terytoryi.
Duščyk padkreśliŭ, što Polšča ŭ mihracyjnym kryzisie abaraniajecca.
«Polšča ŭ hetym kanflikcie abaraniajecca, Biełaruś atakuje. Heta možna skazać vielmi vyrazna, i Biełaruś budzie źviartacca da zusim roznych situacyj, naprykład, sprabujučy destabilizavać nas, bo destabilizacyja polska-biełaruskaj miažy — heta destabilizacyja ŭsiaho Jeŭrapiejskaha Sajuza», — skazaŭ namieśnik ministra.
Adkazvajučy na pytańnie pra mahčymy rost kolkaści sprobaŭ farsavańnia pamiežnych rek, Duščyk adznačyŭ, što niejkaj dynamiki tut nie nazirajecca. Mihranty i raniej sprabavali pierapravicca praz reki na nadzimanych płytach. Pry hetym, siońniašniaja sistema manitorynhu na miažy dazvalaje sačyć i za biełaruskim bieraham. Polskija słužačyja viedajuć, što adbyvajecca na biełaruskaj terytoryi, mabilizujuć patruli i nakiroŭvajuć ich na miesca patencyjnaha parušeńnia.
«My prosta viedajem, što niešta pačynaje adbyvacca na biełaruskaj terytoryi, i tady my mabilizujem siły ŭ tym miescy, dzie hetyja ludzi chočuć pierajści miažu. Što aznačaje prypynieńnie prava na prytułku? Heta aznačaje, što tyja asoby, jakija prypłyli na nadzimanych łodkach abo navat upłaŭ, kali ich stan zdaroŭja narmalny, jany abśledavanyja, i kali niama nijakaj ryzyki, što viartańnie ich na biełaruskuju terytoryju naziemnym šlacham im nie pahražaje, to heta robicca», — patłumačyŭ jon.
Maciej Duščyk taksama zajaviŭ, što polskamu boku viadoma kolkaść mihrantaŭ, jakija znachodziacca ŭ Biełarusi, ale admoviŭsia jaje nazvać.
Pavodle jaho słoŭ, Polšča viadzie kampaniju ŭ sacsietkach, nakiravanuju na raspaŭsiud infarmacyi pra prypynieńnie prava na padaču chadajnictva ab prytułku. Taksama jon byŭ u Jehipcie, dzie abmiarkoŭvaŭ z uładami krainy mahčymaść praviadzieńnia anałahičnaj kampanii.
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta29
Kamientary