Čamu Biełaruś u lidarach u śviecie pa depresijach i čamu takija, jak Łukašenka, da jaje nie schilnyja? Tłumačyć psichaterapieŭtka

— U Biełarusi pražyvajuć 510 764 čałavieki z vyjaŭlenaj depresijaj — heta 5,6% ad usiaho nasielnictva, heta vynikaje z daśledavańnia, zasnavanaha na dadzienych Suśvietnaj arhanizacyi zdaroŭja. Siaredni pakazčyk doli ludziej z depresijaj pa ŭsioj planecie, zhodna z daśledavańniem, składaje 3,9%. Biełaruś na 8-m miescy ŭ suśvietnym rejtynhu sa 180 krain pa kolkaści ludziej z depresijaj. Nakolki depresii biełarusaŭ źviazanyja z tym, što adbyvajecca paśla 2020 hodu, i z vajnoj? Ci praŭda, što depresija — heta naturalnaja prablema, ułaścivaja peŭnamu typu ludziej pry peŭnych umovach?

— Jość ludzi, jakija schilnyja da depresii ci depresiŭnych stanaŭ. Jašče ŭpłyvajuć klimat, pryroda, kolkaść soniečnych dzion u hod. Ale ja liču, što ciapier my majem nastupstvy taho, što našy ludzi znachodziacca pad tryvałym stresam. Čaćvierty hod vielmi składanaja sytuacyja, kali ŭ ludziej šmat adčuvańnia biezdapamožnaści, biessensoŭnaści niejkich dziejańniaŭ. Heta vielmi ŭpłyvaje na psychičny stan ludziej.

— My bačym u chronicy davoli časta naviny pra śmierci siłavikoŭ va ŭzroście plus-minus 50. U hetych kołach, praŭdapadobna, nie pryniata prajaŭlać, jak jany ličać, słabaść i źviartacca pa dapamohu da specyjalista pa psychičnym zdaroŭi. Nakolki represiŭnyja dziejańni ŭpłyvajuć na psychičny stan vykanaŭcaŭ represij?

— Aŭtary ahresii, aŭtary hvałtu taksama majuć nastupstvy ad hvałtu, jaki jany sami čyniać. Jany doŭhi čas znachodziacca ŭ systemie, u žorstkaj hierarchii, tam, dzie šmat prymusu i padparadkavańnia. Na ich idzie mocny cisk z boku systemy, u jakoj jany znachodziacca sami. Plus tam šmat paranoi i niama z kim padzialicca pakutami, pačućciami. Heta mocna ŭpłyvaje. Kali havaryć pra mužčyn, to jany ŭvohule tradycyjna nia schilnyja daviarać inšym, pra svaje pačućci razmaŭlać. Tam šmat kpinaŭ, šmat žartaŭ z roznych nahodaŭ, tamu i vielmi składana havaryć pra toje, jak jany pakutujuć, što adčuvajuć. Heta ŭsio drenna i dla ich stanu.

— Nazirajučy zvonku za Łukašenkam i ciapierašnimi inšymi kiraŭnikami Biełarusi, ci možna specyjalistam zaŭvažyć u ich stan depresii? Ci viadoma, što chto-niebudź z najvyšejšych kiraŭnikoŭ źviartaŭsia pa dapamohu? I nakolki niebiaśpiečnaja depresija ŭ takich ludziej?

— Ja nie mahu skazać, što baču niejkija symptomy depresii. Heta składana vyjavić. Šmat chto ź ludziej, jakija pakutujuć na depresiju, nie raskazvaje, jak im ciažka. Heta vidavočna na tych ludziach, jakija majuć schilnaść da depresiŭnych stanaŭ, jakija ŭvieś čas skardziacca, u ich peŭnaja melodyka movy. A kali my havorym pra zvyčajnych ludziej, to vyjavić depresiju možna, kali jany raskazvajuć pra toje, jak jany śpiać, jak jany siabie adčuvajuć, što ź imi fizyčna adbyvajecca. Kali čałaviek vychodzić u sacyjalnuju prastoru, zaŭsiody niejkuju masku nadziavaje. Možna prosta nie zaŭvažyć.

— Što heta za peŭnaja melodyka movy?

— Samy jaskravy prykład — voślik Ia ź viadomaha mulcika. Kali zaŭsiody zaniapad pry kancy skazu. Vielmi padobna ludzi z depresijaj havorać.

— Słuchajučy 5-hadzinnyja pramovy, ci moža specyjalist zrabić vysnovu pra psychičny stan ci, naprykład, pra schilnaść da depresii? Kali z aŭtamatam vybiahaŭ u 2020 hodzie, ci moža heta być prajavaj depresii?

— Nie. Depresija — heta nie takoje. Kali havaryć pra Łukašenku dy inšych ludziej na vysokich pasadach, jany zvyčajna nia vielmi schilnyja da depresii. Tudy rvucca ludzi ź inšymi charaktarami, uvohule ź inšymi kanstrukcyjami psychiki. Viadoma, byvaje ŭ narcysaŭ i ŭ sacyjapataŭ depresija, usio heta moža być, ale tam inšyja ŭvohule mechanizmy abarony psychiki. Hetyja ludzi kali i pakutujuć na depresiju, to vielmi redka, jak mnie padajecca.

— A chto najčaściej pakutuje na depresiju?

— Heta, napeŭna, ludzi, jakija naadvarot, padparadkavanyja, jakija adčuvajuć na sabie cisk z roznych bakoŭ.

— Ci moža viadomaja zakonapasłuchmianaść biełarusaŭ stać padstavaj dla depresii? Bo treba padparadkoŭvacca…

— Ja b nie kazała, što treba źviartać uvahu na pakuty z pryčyny depresii. Niama roźnicy, ź jakoj pryčyny čałaviek pakutuje. Kali havaryć pra depresiju, to samaje strašnaje, što byvaje pry joj, — heta schilnaść da samahubstva, suicydalnyja dumki. I toje, što depresija źviazanaja z reakcyjaj na niejkija abstaviny, prosta tak nie prachodzić. Jaje treba lekavać.

— Nia ŭsie ludzi z depresijaj źviartajucca pa dapamohu, vialikaja kolkaść biełarusaŭ vyjechała, i vypadki depresij siarod ich nia trapili ŭ rejtynh. Vyhladaje, što realnyja ličby biełarusaŭ z depresijaj mohuć być bolšyja. Jak vy aceńvajecie maštab hetaj prablemy?

— Kali havaryć pra tych ludziej, jakija źviartajucca pa dapamohu, pra maich klijentaŭ, to ja mahu ahučyć takija dadzienyja: pałova ź ich ciapier na antydepresantach. Heta vialiki pakazčyk. Ja była vymušanaja spynić pracu ź ludźmi ŭ Biełarusi, bo heta niebiaśpiečna dla maich klijentaŭ. Ciapier ja pracuju tolki ź ludźmi, jakija znachodziacca ŭ emihracyi.

• 6
• 0
• 5
• 1
• 3
• 15
• 9
• 0