Bajpoł nazvaŭ imiony mahčymych zabojcaŭ Andreja Zielcara. I zajaviŭ, što siłavika «Nirvanu» zastreliŭ svoj ža
U svaim novym rasśledavańni supracoŭniki Bajpoł pradstavili svajo bačańnie padziej, jakija adbylisia ŭ kvatery Andreja Zielcara.
Zhodna z aficyjnaj viersijaj, «28 vieraśnia 2021 hoda padčas praviadzieńnia śpiecmierapryjemstvaŭ pa adpracoŭcy adrasoŭ, pa jakich mahli znachodzicca asoby, datyčnyja da terarystyčnaj dziejnaści, supracoŭniki pravaachoŭnych orhanaŭ pryjšli ŭ kvateru da Andreja Zielcara».
Siłaviki vybili dźviery, a ŭnutry ich sa strelbaj u rukach sustreŭ 31-hadovy ajcišnik. Pa viersii siłavikoŭ, jon zrabiŭ vystrał, jakim paceliŭ u svajho adnahodka, supracoŭnika KDB Dźmitryja Fiedasiuka z pazyŭnym «Nirvana».
Bajpołaŭcy ŭ svaim rasśledavańni śćviardžajuć, što videa, jakoje paźniej raspaŭsiudzili siłaviki, źjaŭlajecca zmantavanym, i pryvodziać šerah dokazaŭ.
Taksama jany śćviardžajuć, što streł sa strelby źjaŭlajecca pastanovačnym, źniatym asobnym dublem.
«Z ulikam cełaj masy pastanovačnych materyjałaŭ my miarkujem, što Zielcar moh i nie zrabić vystrał», — zaŭvažajuć bajpołaŭcy i vykazvajuć svaju viersiju: Fiedasiuk byŭ śmiarotna paranieny svaim kalehaj.
Rasśledvalniki śćviardžajuć, što videa było naŭmysna skambinavana z metaj advieści ad adkaznaści ŭdzielnika šturmavoj hrupy, jaki dapuściŭ samastreł i zabiŭ Fiedasiuka. Da taho ž, kali b byli vyjaŭleny fakty parušeńnia mier asabistaj biaśpieki pry praviadzieńni apieracyi, paśmiarotnyja vypłaty siamji Fiedasiuka nielha było b rabić.
Pra toje, što vystrał byŭ zrobleny mienavita zzadu, pa mierkavańni bajpołaŭcaŭ, śviedčyć i ciomnaje vianoznaje krovaciačeńnie, jakoje ŭ paciarpiełaha śpieradu — tam, dzie bolšaja adtulina. Pry ranieńni mienavita vychadnaja adtulina bolšaja, čym uvachodnaja.
Akramia hetaha, jany źviartajuć uvahu na toje, što cieła śmiarotna paranienaha zavaliłasia napierad, što charakterna pry atrymańni ranieńnia zzadu. Bajpołaŭcy zaŭvažajuć, što pry strele z palaŭničaj strelby ŭ Fiedasiuka razarvała b hrudnuju kletku i adkinuła na ścianu ad udarnaj siły strełu.
Chto moh zabić Zielcera
Bajpłaŭcy śćviardžajuć, što infarmacyju ab składzie hrupy «Alfa» KDB, jakaja ŭzłamała dźviery ŭ kvateru Zielcera, im paviedamiła adna z daśviedčanych krynic.
Jany nazyvajuć niekalki imionaŭ.
Pieršy — heta Vasil Uładzimiravič Kirejka (1985 hoda naradžeńnia), uradženiec vioski Pałonka Baranavickaha rajona Bresckaj vobłaści. Na vajennaj słužbie jon z 2012 hoda. Zajmaŭ pasadu kamandzira ŭzvoda, słužyŭ u tym liku ŭ 33-m asobnym hvardziejskim atradzie śpiecyjalnaha pryznačeńnia sił śpiecyjalnych apieracyj Uzbrojenych sił Biełarusi (vajskovaja častka 97020, jakaja dysłakujecca ŭ Viciebsku). Z 2019 hoda Kirejka byŭ pieraviedzieny ŭ śpiecpadraździaleńnie «Alfa» KDB.
Na videa mužčyna, padobny svaim ciełaskładam da Kirejki, staić źleva ŭ čorna-biełaj kiepcy. Mienavita jon vyciahvaje paranienaha Nirvanu z kvatery.
Druhi — Alaksandr Vasiljevič Zykaŭ (1983), uradženiec Viciebska. Z 2007 hoda mužčyna słužyŭ u 5-j asobnaj bryhadzie śpiecyjalnaha pryznačeńnia sił śpiecyjalnych apieracyj Uzbrojenych sił Biełarusi, zatym u tym ža 33-m asobnym hvardziejskim atradzie śpiecyjalnaha pryznačeńnia. Z 2014 hoda mužčyna byŭ pieraviedzieny ŭ śpiecpadraździaleńnie «Alfa» KDB.
Ź vialikaj vierahodnaściu mienavita Zykaŭ źjaŭlaŭsia kamandziram hrupy. Jon znachodziŭsia zzadu i addavaŭ kamandy.
Treci — Dźmitryj Alaksandravič Kurynnoj (1987), uradženiec Viciebska. Pra jaho viadoma niašmat. Da pierachodu ŭ KDB mužčyna słužyŭ u roznych padraździaleńniach Uzbrojenych sił Biełarusi.
Na 20-j siekundzie videa čuvać, jak Nirvana havoryć: «Dzima, davaj!» — i supracoŭnik u kiepcy pačynaje bić mołatam pa dźviarach. Imia Dźmitryj supadaje ź imiem Kurynnoha.
Bajpołaŭcy śćviardžajuć, što maksimalna pravieryli atrymanuju infarmacyju praź ludziej, jakija asabista znajomyja z nazvanymi supracoŭnikami. Adnak z-za taho, što tvary siłavikoŭ zablurany, nielha z poŭnaj upeŭnienaściu śćviardžać, što na videa mienavita Kirejka, Zykaŭ i Kurynnoj.
U svaim rasśledavańni bajpołaŭcy taksama tłumačać, navošta siłaviki pryjšli ŭ kvateru da Andreja Zielcara i Maryi Uśpienskaj, jakija nie byli zaŭvažany ŭ pratestach.
Bajpołaŭcy śćviardžajuć, što ź imi źviazaŭsia brat Maryi Maksim Jurčanka. Jak patłumačyŭ mužčyna, 26 vieraśnia 2021 hoda na svajoj staroncy ŭ instahramie jon raźmiaściŭ videa akcyi hrupy biełaruskich partyzan «Čorny busieł» ab atacy z dapamohaj drona bazy AMAP va Uruččy. Na ščaście, Maksim u kvatery nie pražyvaŭ i znachodziŭsia ŭ toj čas za miažoj u Hruzii.
Kamientary
oni otvažnyje tolko protiv biezoružnych, a kak vidiat oružije u druhich ot stracha načinajut paliť kuda hłaza hladiat.. dažie jeśli "po svoim"..