Piać faktaŭ pra miljardera Bahaluba Karyča, ź jakim sustrakaŭsia Łukašenka
Učora Alaksandr Łukašenka pravioŭ sustreču z suzasnavalnikami mižnarodnaj kamiercyjnaj kampanii «Braty Karyčy». Adzin z udzielnikaŭ spatkańnia – deputat Skupščyny (parłamienta) Sierbii Drahamir Karyč. Mienavita jon paviedamiŭ, što naprykancy kastryčnika Minsk maje naviedać prezident Sierbii Tamisłaŭ Nikalič.
Bolš cikavaja asoba druhoha ŭdzielnika sustrečy — miljaniera Bahaluba Karyča. Heta čałaviek znachodzicca ŭ mižnarodnym vyšuku Interpała.
61-hadovy Bahalub Karyč — adzin z najbahaciejšych ludziej Sierbii. Jahonaja kampanija «Braty Karyčy» pracuje ŭ samych roznych śfierach dziejnaści: budaŭnictva (voźmucca za prajekt «Minsk-Mir»), telekamunikacyi, finansy, adukacyja, ŚMI.
Pry kiraŭnictvie Słabadana Miłošaviča Karyča nazyvali «ministram biez partfiela», chacia i ministram pryvatyzacyi paru miesiacaŭ jon pabyŭ. Pa nieaficyjnych źviestkach, jahonaje bahaćcie dasiahała 5 miljardaŭ dalaraŭ. Jasna, što biez dazvołu i zastupnictva ŭładaŭ va aŭtarytarnaj krainie Karyč by nie dasiahnuŭ takich pośpiechaŭ.
Amal jak niekatoryja siońniašnija biełaruskija biznesoŭcy, u kancy 1990-ch Karyč byŭ abvieščany «nieŭjaznym» na terytoryju Jeŭrasajuza, to bok trapiŭ u sankcyjnyja śpisy. Inšym razam Karyča nazyvali «kašalkom Miłošaviča».
Paśla źviaržeńnia režymu Miłošaviča pazicyi Karyča stali bolš chistkimi. Jašče ŭ 2001 hodzie jamu byli vystaŭlenyja abvinavačańni ŭ niezakonnym vyvadzie hrošaj za miažu, ale ad hetaha ŭdałosia adkrucicca. Biznesmen navat sprabavaŭ vyłučacca ŭ prezidenty, na vybarach 2004 hoda zaniaŭ treciaje miesca z 18% hałasoŭ. Zasnavaŭ palityčny ruch «Siła Sierbii».
U 2006 hodzie suprać Bahaluba Karyča była zaviedzienaja kryminalnaja sprava za finansavyja machinacyi. Heta adbyłosia paśla rasśledavańnia dziejnaści pieršaha sierbskaha apieratara mabilnaj suviazi Mobtel, była vyjaŭlena škoda dziaržavie ŭ pamiery 40 miljonaŭ jeŭra. Prybytki ad mabilnaj kampanii z dapamohaj firmaŭ-adnadzionak vyvodzilisia ŭ afšornyja zony. Byŭ vydadzieny ordar na aryšt Karyča, ale da taho času jon užo pakinuŭ Sierbiju. Pisałasia navat, što ź Białhrada Karyč vylecieŭ u Minsk.
Praŭda, u vyniku biznesoviec atrymaŭ prytułak u Maskvie. Rasija admaŭlajecca vydavać Karyča Sierbii. Varta adznačyć, što ŭ Rasii znajšli prytułak taksama žonka i syn Słabadana Miłošaviča.
U sakaviku sioleta Bahalub Karyč zajaviŭ, što hatovy viarnucca ŭ Sierbiju, kali sprava suprać jaho budzie spynienaja. U mai Karyč byŭ na vajskovym paradzie ŭ Maskvie.
Cikava, što ŭ Drazdach-2 budaŭnictva katedža viadzie Aliviera Niadzielkavič, siastra Bahaluba Karyča. Niezrazumieła, ci heta jana robić dla siabie, ci dla brata.
Kamientary