Suhak, Mientusava, Danejka, Meryjem i inšyja paśpiachovyja biełaruski padzialilisia hałoŭnymi žyćciovymi abłomami

Maryna Mientusava adznačyła, što prydumała arhanizavać taki ivent sa svajoj siabroŭkaj Vieraj, kab dapamahać žančynam pavyšać talerantnaść da pamyłak, bo ŭ našym hramadstvie ŭ pryncypie nie pryniata lohka stavicca da pralikaŭ, a ŭžo kali havorka idzie pra žančyn — tym bolš.

«Kali my chočam niečaha dasiahnuć, treba ŭsprymać pamyłki jak častku šlachu, a nie katastrofu. Kryštalna biełaje reputacyjnaje palito nie harantuje ščaścia i pośpiechu», — padkreśliła Maryna Mientusava.

Sama jana adrazu vykłała publicy ŭsie kozyry pra siabie.

«Ja łažaju ŭvieś čas, i heta nie kakiectva. Ja toj čałaviek, jaki nie pamianiaŭ pašpart za tydzień da taho, jak jaho treba było mianiać, i za tydzień da taho zakona, kali jaho ŭžo nielha było potym mianiać. Parvanyja sukienki za chvilinu da vystupaŭ, try razvody na try šluby, čatyry emihracyi, pamiž 3-4 kryminalnymi spravami. Časam mnie padajecca, što ŭ mianie budzie nie bijahrafija, a letapis łažy, u jakuju ja ŭmudryłasia ŭstupić».

Jak u čałavieka, jaki daŭno pracuje ŭ śfiery iventaŭ, u Kaciaryny Rajeckaj nazapasiŭsia ceły stos historyj-fakapaŭ. Mnohija ź ich navučyli jaje, što ŭ pracy pažadana abapiracca na pravieranych ludziej, jakija razumiejuć tvaje kaštoŭnaści, i navat kali ty daviaraješ padradčykam, lepš pieradbać i ŭsio pierapravieryć.

«Muzyčny rynh», Čyžoŭka arena, supierfinał. My zaprašajem tudy vialikuju artystku. I potym z aparatnaj ja baču, jak pobač ź joj pačynaje kapać płastyk z safita, na jaje kresła i pobač. Za siekundu, zdajecca, ja abbiehła płošču vialikaj areny, kab nacisnuć knopku, kab ludziej pačali evakujavać. U pracesie vyśvietliłasia, što našy padradčyki nie pramačyli firanki śpiecyjalnaj supraćpažarnaj prapitkaj. Usio nahrełasia, a tam zakrytaja placoŭka, dzie było 200 čałaviek, šmat pravadoŭ, techniki…».

Jašče adna historyja ad Kaci była pra epizod z karjery, jaki mocna napužaŭ jaje i vyvieŭ ź siabie, zdajecca, macniej za zatrymańnie jaje muža Dzianisa Dudzinskaha.

«Išoŭ 2015 hod, ja pradziusavała mižnarodnaje šou «Bitva charoŭ». Pryjechała šmat zamiežnikaŭ. My praviali kłasnaje šou, uvieś Pałac sportu try dni hudzieŭ — usie adpracavali sapraŭdy bliskuča. I voś my išli na cyrymoniju ŭznaharodžvańnia pieramožcaŭ. I tam pavinien byŭ spracavać pnieŭmafiejervierk — taki załaty doždž, bliščynki, jakija raźlatajucca. Viadučy anansavaŭ, što pieramoh francuzski chor. Usia scena była abniesienaja aharodžami.

Ale padčas zapłanavanych strełaŭ fiejervierka adzin francuz padchapiŭsia, pieraskočyŭ praz aharodžu i apynuŭsia ŭ zonie, dzie jakraz pracuje pnieŭmafiejervierk — i voś jamu ŭ tvar stralajuć usie bliskaŭki».

Kaciaryna raspaviała, što francuz tady traŭmavaŭ voka, i heta historyja pakazała joj, što navat kali ty ŭsio pradumaŭ, to situacyja moža pajści naŭskasiak. «Abarona ad durnia patrebnaja paŭsiul», — padsumavała Kacia.

Kaciaryna Danejka z CleanWhale, zdajecca, mahła b raskazvać bajki pra klininh da nočy.

Za hady pracy jana z partniorami razrulvała i toje, što supracoŭnica zamiest taho, kab prybiracca, źjeła ŭ klijenta tuniec i napiłasia jaho ž ałkaholem, u vyniku zasnuŭšy ŭ kvatery. Jašče adna rabotnica paklikała na kvateru svajho bojfrenda. «Mahčyma, ich videa možna znajści na Pornchabie», — prakamientavała Kaciaryna. Siabry inšych supracoŭnikaŭ niejak pryjšli na kvateru i źjeli cukierki syna klijentki, potym apraŭdvajučysia tym, što ŭ ich upaŭ uzrovień cukru ŭ kryvi.

Ale hałoŭnym fakapam na hetym etapie dyrektarka klininhu nazvała toje, jak časam infantylna pavodziła siabie ŭ biznesie, jaki jany z partniorami maštabujuć z 2016 hoda. «Pieršy raz mnie treba było zvolnić čałavieka ŭ 22 hady, a ŭ jaje ž syn u turmie, finansavyja składanaści… Heta dałosia mnie baluča, ja pryjšła dadomu i praraŭła ŭvieś viečar. Dumała, moža, dać žančynie čarhovy šaniec».

Pieršyja surjoznyja składanaści nastolki vybili Kaciarynu z kalainy, što jana źliłasia sa svaich pracoŭnych abaviazkaŭ, pierastała adkazvać kaleham u čatach. Paźniej takoje ž paŭtaryłasia, kali ich klininhu treba było vychodzić na niamiecki rynak, jaki padavaŭsia joj niepadjomnym.

«Ja skidvała šmat u žyćci na PMS, depresiju ci SDUH zamiest taho, kab pryniać svaje strachi i navučycca brać adkaznaść», — ščyra pryznałasia dziaŭčyna.

Natali Padalak taksama padzialiłasia chutčej navat nie fakapam, a historyjaj pryniaćcia ŭłasnaha šlachu i ŭnutranaj transfarmacyi. Razam z mužam jany ŭ svoj čas stvaryli paśpiachovuju anłajn-škołu kandytarskaha majsterstva Lililoveme. Ale Natali tak asabista pieražyvała padziei ŭ Biełarusi ŭ 2020-m, a potym i vajnu va Ukrainie, što praca adyšła na druhi płan. Nakłaŭsia i dekret. Paźniej jana asensavała, što heta ŭžo nie toj prajekt, jakim jana choča zajmacca, choć jon i byŭ paśpiachovy.

«Było, kaniečnie, vielmi ciažka. Treba było zrazumieć, čym ja znoŭ chaču zajmacca ŭvohule, «kim chaču stać, jak vyrastu». Samaje hałoŭnaje, što ja ŭ vyniku asensavała, što maja kaštoŭnaść nie ŭ biznesie, ja kaštoŭnaja sama pa sabie. Kali vy niekali taksama budziecie ŭ stanie — «mnie treba» i «ja bolš tak nie mahu», viedajcie, što heta nie pravał, a kropka rostu, momant, dzie vy možacie pierasabrać siabie nanoŭ», — dała paradu Natali, staviačy ŭ prykład siabie i muža, jaki ciapier znajšoŭ siabie ŭ dyzajnie knižak. Natali ž dapamahaje achvotnym sa stratehijaj raźvićcia błohaŭ.

Samaj viasiołaj, zdajecca, historyjaj padzialiłasia žurnalistka Jaŭhienija Suhak. Spačatku jana dumała zhadvać niešta sa svajoj raznastajnaj žurnalisckaj karjery pad zahałoŭkam «moj hałoŭny fakap — toje, što ja ŭ pryncypie stała žurnalistkaj, i ciapier sprabuju nie pamierci pad mostam». Ale na spravie raspaviała historyju z časoŭ padpracoŭki ŭ kazino.

«Na śvitanku studenctva ja pajšła tudy časova padpracavać. I kali ŭ pieršy miesiac mnie dali razava čajavyja 500 dalaraŭ, ja tam vyrašyła zatrymacca. Ja musiła vyvučyć usie praviły: pokier, ruletka, błekdžek… Ale ja ž była studentkaj, tamu vyrašyła nie vučyć, maŭlaŭ, i tak hulcy viedajuć praviły. I voś adnojčy zavitaŭ čałaviek, jaki nie viedaŭ praviły pokiera. Jon padyšoŭ da mianie spytać — a ja taksama nie viedaju. A vakoł kamiery! U vyniku ja prydumała kavałačak praviłaŭ! I hety čuvak navat pa ich vyjhraŭ! Dahetul nie viedaju, ci pa maich usio ž praviłach, ci pa svaich, ale jon daŭ mnie na čaj».

Byłaja palitźniavolenaja Meryjem Hierasimienka, vidavočna, nie mahła abminuć uvahaj toj fatalny dzień sa žniŭnia 2022-ha, kali jana praśpiavała ŭ Minsku na aŭtarskim vuličnym kancercie pieśniu «Obijmi» hurta «Okiean Elzi». Paśla hetaha jaje žyćcio pierakuliłasia. «Maju škołu zakryli, u siabroŭ adcisnuli bar, maładoha čałavieka departavali ź Biełarusi na 10 hod, ja praviała ŭ turmie 6,5 miesiaca…».

Śpiavačka ščyra pryznałasia, što na hety momant śpieć «Obijmi» u Minsku ŭzoru 2022-ha pa sumie ŭsich nastupstvaŭ — dla jaje heta hałoŭny fakap.

«Nas vy**ali tak, što nie pieradać słovami. Ale ja nie zdradziła sabie. Ja zaŭsiody za mir, svabodu, Ukrainu, biełarusaŭ i rasijan (moj muž — rasijanin)», — sarvała apładysmienty Meryjem.

Pavialičyć

• 8
• 4
• 4
• 9
• 0
• 1
• 0
• 1