Karystajeciesia vadkaściu dla pałaskańnia rota štodnia? Daktary zaścierahajuć ad hetaha

Rekłama padaje vadkaści dla pałaskańnia rotavaj połaści jak efiektyŭny srodak u baraćbie z zubnym nalotam, niepryjemnym pacham i zachvorvańniami dziasnaŭ. Adnak nikoli nie kažuć pra admoŭnaje ŭździejańnie.

Śpiecyjalisty papiaredžvajuć pra toje, što praciahłaje ŭžyvańnie antybakteryjnych vadkaściaŭ dla apałoskvańnia rota moža vyklikać niečakanyja nastupstvy dla zdaroŭja jak u rotavaj połaści, tak i dla arhanizma ŭ cełym. Daśledavańni ŭzdymajuć važnyja pytańni pra biaśpieku hetych srodkaŭ.

Antybakteryjnyja apałoskvalniki stvoranyja dla źniščeńnia abo padaŭleńnia rostu bakteryj u rocie z dapamohaj roznych chimičnych rečyvaŭ, jakija mohuć parušać bałans mikrafłory rotavaj połaści, źniščajučy jak škodnyja, tak i karysnyja bakteryi.

Choć rot moža zdavacca čystym adrazu paśla ŭžyvańnia apałoskvalnika, škodnyja bakteryi adnaŭlajucca chutčej, što robić ludziej bolš uraźlivymi da infiekcyj i zapalenčych zachvorvańniaŭ, takich jak hinhivit i paradantyt.

Akramia taho, mnohija apałoskvalniki, asabliva z utrymańniem śpirtu, mohuć vyklikać suchaść u rocie i źnižeńnie ŭzroŭniu śliny, jakaja adyhryvaje klučavuju rolu ŭ padtrymcy zdaroŭja rotavaj połaści, niejtralizujučy kisłoty, vydalajučy reštki ježy i kantralujučy rost bakteryj.

Pamianšeńnie patoku śliny nie tolki vyklikaje dyskamfort, ale i pavialičvaje ryzyku ŭźniknieńnia karyjesu, zachvorvańniaŭ dziasnaŭ, stamatytu, jazvaŭ u rocie i drennaha pachu z rota.

Niekatoryja daśledavańni źviazvajuć praźmiernaje vykarystańnie apałoskvalnikaŭ na asnovie śpirtu z padvyšanaj ryzykaj raźvićcia raku rotavaj połaści, bo jany spryjajuć praniknieńniu kancerahiennych rečyvaŭ, takich jak nikacin, u ślizistuju abałonku.

Tak, vyniki adnaho z daśledavańniaŭ pakazali, što trochmiesiačnaje vykarystańnie srodku dla pałaskańnia rota sa śpirtam «Listeryn» pryviało da značnaha pavieličeńnia kolkaści dvuch vidaŭ umoŭna-patahiennych bakteryj: Fusobacterium nucleatum i Streptococcus anginosus. Hetyja bakteryi źviazanyja z bolš vysokaj ryzykaj zachvorvańniaŭ dziasnaŭ, a taksama raku stravavoda i toŭstaj kiški.

Jašče adnoj niečakanaj ryzykaj, źviazanaj z antybakteryjnymi vadkaściami dla apałoskvańnia rotavaj połaści, źjaŭlajecca ich upłyŭ na zdaroŭje sardečna-sasudzistaj sistemy. Jak tłumačać śpiecyjalisty, praces stravavańnia pačynajecca ŭ rotavaj połaści, dzie zdarovyja bakteryi dapamahajuć pieratvarać nitraty ź ježy ŭ aksid azotu, jaki adyhryvaje važnuju rolu ŭ rehulavańni arteryjalnaha cisku.

Daśledavańni pakazali, što ŭ ludziej, jakija vykarystoŭvali antybakteryjnyja apałoskvalniki dla rota dvojčy ŭ dzień, nazirałasia pavyšeńnie arteryjalnaha cisku.

Bolš tryvožnym źjaŭlajecca toje, što kahortnyja daśledavańni pakazali suviaź pamiž antysieptyčnymi apałoskvalnikami dla rota i pavyšanaj śmiarotnaściu siarod špitalizavanych pacyjentaŭ. Daśledčyki ličać, što heta źviazana z parušeńniem bałansu aksidu azotu, što akazvaje niehatyŭnaje ŭździejańnie na chraničnyja zachvorvańni, takija jak ateraskleroz i dyjabiet, što, u svaju čarhu, pavialičvaje ryzyku surjoznych uskładnieńniaŭ, uklučajučy išemičnuju chvarobu serca i siepsis.

Uličvajučy patencyjnyja ryzyki antybakteryjnych vadkaściaŭ dla apałoskvańnia rotavaj połaści, ekśpierty rekamiendujuć ich vykarystoŭvać z aściarožnaściu. Takija srodki mohuć być karysnymi ŭ peŭnych situacyjach — naprykład, paśla stamatałahičnych pracedur ci dla karotkaterminovaha lačeńnia zachvorvańniaŭ dziasnaŭ, adnak nie varta prymianiać ich u jakaści štodzionnaj prafiłaktyki.

Mnohija stamatołahi zhodnyja z tym, što lepš prytrymlivacca bolš zbałansavanaha padychodu da hihijeny połaści rota. Rehularnaja čystka zuboŭ, zubnaja nitka i zachavańnie zdarovaj dyjety mohuć značna dapamahčy ŭ praduchileńni prablem z zubami bieź nieabchodnaści prymianieńnia antybakteryjnych vadkaściej dla pałaskańnia rota. A aśviažyć dychańnie dapamohuć nieantysieptyčnyja apałoskvalniki z utrymańniem efirnych alejaŭ.

• 5
• 2
• 1
• 2
• 5
• 2
• 0
• 0