Mer łatvijskaha Daŭhaŭpiłsa nazvaŭ Krym rasijskim i abvinavaciŭ u zabojstvach u Bučy ŭ tym liku Ukrainu i ZŠA. U Kijevie jamu adkazali
U Ministerstvie zamiežnych spraŭ Ukrainy prakamientavali vykazvańni mera Daŭhaŭpiłsa — druhoha najbujniejšaha horada Łatvii — Andrejsa Ełksnyńša ab «rasijskim Krymie» i ŭchileńni palityka ad taho, kab nazvać Rasiju ahresaram i adzinym vinavatym u vajnie.
«Mer łatvijskaha horada Daŭhaŭpiłs Andrejs Ełksnyńš apraŭdvaje złačynstvy Rasii va Ukrainie. Niadziŭna, što jaho palityčnaja siła apynułasia na abočynie palityki pa vynikach apošnich vybaraŭ u Siejm Łatvii», — adznačyŭ pres-sakratar ukrainskaha źniešniepalityčnaha viedamstva Aleh Nikolenka.
Jon dadaŭ, što, na ščaście, «vykazvańni hetaha marhinalnaha dziejača nie adlustroŭvajuć ni aficyjnaj pazicyi družalubnaj dla nas Łatvii, ni pohladaŭ absalutnaj bolšaści łatvijcaŭ, jakija nie tolki ščyra spačuvajuć, ale i aktyŭna dapamahajuć Ukrainie ŭ jaje baraćbie suprać rasijskaj ahresii».
Nieadnaznačnyja zajavy Ełksnyńša prahučali ŭ efiry telebačańnia. Jaho niekalki razoŭ pierapytali, ci chacieŭ by jon pieramohi Ukrainy i parazy Rasii, na što jon niekalki razoŭ zapar adkazvaŭ, što «ŭ vajnie nie budzie pieramožcaŭ» i heta čałaviečaja trahiedyja.
Na pytańnie ab Krymie mer skazaŭ, što «Krym źjaŭlajecca častkaj Rasijskaj Fiederacyi». Paśla zaŭvahi, što amal usia mižnarodnaja supolnaść nie pryznała akupacyju paŭvostrava, jon adkazaŭ, što heta tak, ale «niemahčyma admaŭlać fakt, što jaho ŭklučyli ŭ skład RF, i što ŭvieś śviet praciahnuŭ paśla hetaha supracoŭničać z Rasijaj».
Adkazvajučy na pytańnie ab adkaznaści Rasii za zabojstvy cyvilnych u Bučy, mer skazaŭ, što «za ŭsio, što adbyłosia, adkaznyja i Rasija, i Ukraina, i ZŠA».
Andrejs Ełksnyńš źjaŭlajecca pradstaŭnikom sacyjał-demakratyčnaj partyi Saskaņa («Zhoda»), jakaja tradycyjna mieła značnuju padtrymku siarod ruskamoŭnych žycharoŭ Łatvii, i tolki na apošnich vybarach u Siejm vosieńniu 2022 hoda nie zmahła pieraadoleć 5-pracentny barjer.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ20
Kamientary