«Maralna padtrymlivaŭ niavyznačanych asob». Pačaŭsia sud nad Ściapanam Łatypavym z Płoščy Pieramien
U sudzie Savieckaha rajona Minska 1 červienia pačali razhlad spravy Ściapana Łatypava — viadomaha žychara Płoščy Pieramien (kvartała pamiž vulicami Čarviakova i Smarhoŭski trakt).
Spravu razhladaje sudździa Voŭk. Pierš za ŭsio jon zabaraniŭ zdymać fota i videa — navat u pierapynkach pasiadžeńnia.
Łatypaŭ — arbaryst, dyrektar nievialikaha pradpryjemstva «Biełarbo». Z dapamohaj chimičnych rečyvaŭ jon vyniščaŭ škodnyja raśliny, takija jak barščeŭnik.
Ściapan byŭ zatrymany jašče 15 vieraśnia, u jaho domie prajšoŭ pieratrus. Pravaabaroncy pryznali jaho palitviaźniem.
Spačatku dziaržSMI raspaŭsiudžvali infarmacyju, što Łatypaŭ nibyta kaardynavaŭ pratesty, źbiraŭ dla finansavańnia hetaha hrošy, navat nibyta chacieŭ vykarystać niejkija chimikaty suprać milicyjantaŭ.
Čytajcie taksama:
Karajeŭ pra palitviaźnia Łatypava: Jon płanavaŭ raźviejać jadachimikaty na bajavyja paradki AMAPa
Praŭda, paźniej, kali Ściapanu vystavili abvinavačvańnie, momant pra atručvańnie chimikatami milicyjantaŭ źnik.
Čytajcie taksama:
Žychara Płoščy Pieramien Łatypava bolš nie abvinavačvajuć u tym, što chacieŭ «atrucić siłavikoŭ»
Ciapier Łatypava abvinavačvajuć va ŭdziele ŭ masavych biesparadkach i machlarstvie. Jon nibyta padmanvaŭ sielvykankamy i pradpryjemstvy ŭ 2019-2020 hadach: damaŭlaŭsia ab źniščeńni barščeŭnika, ale «stvaraŭ ujaŭnaść pasłuh, vykarystoŭvajučy zabaronienyja na terytoryi Respubliki Biełaruś nieŭstalavanyja srodki».
Praściej kažučy, Łatypavu staviać u vinu, što jon śviadoma ŭkazvaŭ u damovie adno kankretnaje chimičnaje rečyva, a vykarystoŭvaŭ inšaje, nieviadomaje.
«Naŭmysna ŭvioŭ u zman zakazčykaŭ, prymaŭ hrošy, nie majučy namieru vykanać pracu. Takim čynam paciarpieła 16 jurasob, naniesienaja škoda ŭ asabliva bujnym pamiery», — začytvaŭ abvinavačvańnie prakuror.
Taksama Łatypava abvinavacili ŭ padrobcy dakumientaŭ, źviazanych z pracaj jaho pradpryjemstva.
Akramia taho, sa žniŭnia pa vierasień Ściapan «arhanizavaŭ hrupavyja dziejańni, jakija parušajuć hramadski paradak», praciahnuŭ prakuror. Łatypaŭ, pa viersii śledstva, ź nieŭstalavanymi asobami vykazvaŭ palityčnyja pohlady, udzielničaŭ u pratestach, što paciahnuła parušeńnie pracy hramadskaha transpartu. Schilaŭ da parušeńnia paradku i navučaŭ nievyznačanych śledstvam asob, jakich «maralna i materyjalna padtrymlivaŭ». Publična zaklikaŭ u internecie da pratestaŭ, źbiraŭ hrošy.
Taksama jon nie davaŭ zafarbavać murał na Płoščy Pieramien, paśla čaho «akazaŭ supraciŭ milicyi, pahražajučy hvałtam».
Ciapier, darečy, hetyja milicyjanty siadziać na sudzie ŭ jakaści paciarpiełych.
Ściapan Łatypaŭ vinu nie pryznaŭ.
Zatym dapytali paciarpiełych.
Milicyjant Vasil Rohaŭ raspavioŭ, što 15 vieraśnia 2020 hoda kamunalniki paprasili milicyju ab dapamozie. Kamunalniki chacieli zafarbavać «nadpisy palityčnaha charaktaru», ale Łatypaŭ ź inšymi ludźmi stajaŭ i nie davaŭ hetaha zrabić.
«Vakoł nas pačali źbiracca ludzi, my zapytali dapamohu — susiedni narad milicyi. Prybirali Łatypava ad ściany, nie atrymałasia, ludzi pačali kryčać, nie davali Łatypava advieści da słužbovaha aŭto.
Chacieli jamu zahnuć ruku za śpinu, ale jon mocna supraciŭlaŭsia, daviałosia jaho padniać i nieści.
Ale jon sčapiŭ ruki ŭ zamok, razmachvaŭ rukami, kruciŭsia, kazaŭ: adpuścicie, što vy robicie. Padčas hetaha ŭdaryŭ mianie nahoj u vobłaść hałavy.
Jaho zmahli zatrymać tolki z dapamohaj supracoŭnikaŭ, jakija prybyli», — skazaŭ paciarpieły.
U Łatypava padčas pasiadžeńnia na tvary bačny ci to siniak, ci to niešta padobnaje. I, zdajecca, Ściapan znajšoŭ sposab dać zrazumieć prysutnym, što ź im zdaryłasia.
Kali sudździa spytaŭ, ci jość u Łatypava pytańni da milicyjanta Rohava, toj skazaŭ, što jość.
«Paciarpieły, vy kazali, što ja ŭdaryŭ vas u tvar nahoj, — skazaŭ Łatypaŭ. — Pahladzicie na mianie. U vas byŭ charakterny aciok na tvary, jak u mianie?»
«Nie», — adkazaŭ milicyjant Rohaŭ.
«Bolš niama pytańniaŭ», — skazaŭ Łatypaŭ.
Paśla pierapynku ŭ sudzie Ściapan Łatypaŭ zrabiŭ sprobu pierarezać sabie horła.
Jon staŭ na łaŭku i ŭvatknuŭ ručku ŭ horła. Pierad hetym jon skazaŭ: «HUBAZ paabiacaŭ, kali ja nie pryznaju vinu, buduć kryminalnyja spravy suprać rodnych i susiedziaŭ».
U Ściapana Łatypava była z saboj papka z dakumientami. Jon dastaŭ ź jaje niejki pradmiet, mahčyma, ručku. Zalez na łaŭku, upiorsia nahami ŭ kraty i ŭvatknuŭ sabie štości ŭ horła ci pačaŭ jaho rezać. Potym upaŭ, staŭ rezać ruki.
Adrazu nie zmahli adkryć kletku, bo ŭ kanvairaŭ nie było klučoŭ. Jany byli ŭ kahości za dźviaryma.
Pakul adkryli kletku, Ściapan užo straciŭ prytomnaść.
Pryjechała chutkaja.
Što papiaredničała ŭčynku?
Paśla abiedu vyklikali śviedkam baćku Ściapana, jon daŭ pakazańni.
Sudździa spytaŭ: «Ci jość pytańni ŭ abvinavačanaha?»
I Ściapan skazaŭ: «Baćka, paśla spatkańnia [z taboj] da mianie pryjšoŭ HUBAZ, paabiacaŭ, što kali ja nie pryznaju vinu, u mianie budzie pres-chata, kryminalnyja spravy suprać rodnych i susiedziaŭ».
«Pres-chata ŭ mianie była — 51 dzień, — skazaŭ Ściapan baćku. — Tak što ty rychtujsia».
I potym pačaŭ rezać sabie horła, raspaviali «Našaj Nivie» prysutnyja.
Kamientary