Jak rasijskija siłaviki i prapahandysty mohuć atrymlivać pašparty jeŭrapiejskich krain
Dniami stała viadoma, što nabližanyja da Kramla rasiejcy partyjami atrymlivali hramadzianstva Sierbii, pačynajučy z 2022 hoda. Pašpart hetaj jeŭrapiejskaj krainy dazvalaje jahonym ułaśnikam volna pieramiaščacca pa ES.
Ilustracyjny zdymak. Fota: «Naša Niva»
Ułady Sierbii z 2022 hoda pa krasavik 2025-ha pryniali ŭ hramadzianstva krainy 204 hramadzian Rasii. «Važnyje istorii» daviedalisia, što siarod ich šmat ludziej, blizkich da Kramla.
Usie jany atrymali sierbskija pašparty nibyta za asablivyja zasłuhi pierad sierbskaj dziaržavaj. Dla atrymańnia hramadzianstva takim čynam nie abaviazkova mieć sierbskija karani ci pražyvać u krainie peŭny čas. Hałoŭnaja ŭmova — kab Sierbija pryznała, što vy «zasłuhoŭvajecie» stać jaje hramadzianinam.
Daśledčyk karupcyi i kiraŭnik NKA «Arktyda» Illa Šumanaŭ miarkuje, što takaja masavaja vydača pašpartoŭ rasiejcam, źviazanym z Kramlom i abaronnaj pramysłovaściu, mahła być častkaj palityčnych damoŭlenaściaŭ dvuch uradaŭ. U takim scenary ŭrad Sierbii moža atrymać ad Maskvy instrumienty kantrolu va ŭmovach masavych antyŭradavych pratestaŭ, jakija nie spyniajucca ŭ krainie z pačatku 2024 hoda, kaža Šumanaŭ u kamientary «Važnym istorijam».
Mienavita padčas pratestaŭ adbyŭsia ŭsplosk vydačy pašpartoŭ Sierbii rasiejcam.
«Dumaju, havorka taksama idzie pra niefarmalnuju finansavuju padtrymku, vydaču pazyk i kredytaŭ, jakija pojduć na padtrymańnie režymu. Plus vielmi vyhadnyja kantrakty z rasijskimi kampanijami. Pryciahnieńnie rasijskich inviestycyj — heta adzin z samych hałoŭnych krukoŭ, na jakija možna padviesić ułady Sierbii. Tam prysutničaje palityčnaja turbulentnaść. I Rasija, naprykład, moža dać instrumienty pa manitorynhu sacyjalnych sietak. Usie aŭtarytarnyja praktyki, jakimi Rasija mahła b padzialicca, u Sierbii vielmi buduć zapatrabavanyja», — razvažaje Šumanaŭ.
Kupić pašpart za 120 tysiač jeŭra
Ale atrymać hramadzianstva Sierbii «za asablivyja zasłuhi» mohuć i šarahovyja hramadzianie Rasii, Biełarusi ci jakoj-niebudź inšaj krainy — treba tolki zapłacić.
U Rasii, Małdovie i Ukrainie chapaje firm, jakija za peŭnuju sumu hrošaj dapamahajuć znajści padstavy dla atrymańnia hramadzianstva toj ci inšaj krainy.
U vypadku ź Sierbijaj adna z takich kampanij prapanuje atrymać pašpart «za asablivyja zasłuhi pierad dziaržavaj» za 120 tysiač jeŭra.
Padobnyja pasłuhi prapanujuć i pa Bośnii i Hiercahavinie — za 130 tysiač jeŭra.
Pasiaredniki abiacajuć, što ciaham 6-12 miesiacaŭ zajaŭnik harantavana atrymaje pašpart.
Za kolki pradajuć pašpart ES
Za bolšyja hrošy mohuć prapanavać pasłuhi pa atrymańni hramadzianstva niekatorych krain, jakija ŭvachodziać u ES. Ale terminy, jak praviła, buduć bolš praciahłymi, bo davodzicca prytrymlivacca farmalnaściej.
Naprykład, u vypadku z Polščaj firmy prapanujuć dva varyjanty atrymańnia pašparta.
Pieršy — na padstavie repatryjacyi. Dziejańnie prahramy raspaŭsiudžvajecca na palakaŭ-emihrantaŭ, a taksama ich naščadkaŭ da treciaha pakaleńnia, jakija na 1 studzienia 2001 hoda pražyvali na terytoryi azijackich rehijonaŭ byłoha SSSR, u tym liku i Rasijskaj Fiederacyi.
Košt pasłuhi — 250 tysiač jeŭra. Pamahatary abiacajuć, što pašpart u vas budzie praz hod.
Ilustracyjny zdymak. Fot: «Naša Niva»
Druhi varyjant kaštuje 150 tysiač jeŭra. Tam asnoŭnaja zadača pamahataraŭ budzie ŭ tym, kab razdabyć vam dakumienty, jakija paćviardžajuć najaŭnaść u vas polskich karanioŭ. Ci jość takija karani nasamreč, dla firm nie maje značeńnia.
Termin atrymańnia hramadzianstva ŭ takim vypadku 2,5-3 hady.
Hramadzianstva Rumynii nielehalnyja ahienctvy prapanujuć usiaho za 30 tysiač jeŭra. Jany abiacajuć praanalizavać siamiejnaje dreva i znajści svajaka, pra jakoha zachavałasia mienš za ŭsio infarmacyi. Dalej jany robiać zapyt ab adnaŭleńni danych, u adkazie na jaki buduć paznačany patrebnyja terytoryi. Naprykład, dla hramadzianstva Rumynii znojduć prynaležnaść vašych prodkaŭ da Małdovy albo Čarnavickaj ci Adeskaj vobłaści Ukrainy. Taki «adnoŭleny» dakumient i budzie hałoŭnaj padstavaj dla taho, kab atrymać rumynskaje hramadzianstva, abiacajuć u ahienctvach.
Pierapravieryć infarmacyju ab realnym pachodžańni vašych prodkaŭ, pa słovach kantor, nichto nie moža, pakolki takoj krainy, jak SSSR, užo daŭno nie isnuje. Roŭna jak i niama ahulnych baz danych.
Taki sposab znachodžańnia rumynskich karanioŭ pradstaŭniki padobnaha rodu biznesu nazyvajuć «aficyjnym zapaŭnieńniem prabiełaŭ u historyi».
Mnohija z padobnych ahienctvaŭ majuć ofisy va Ukrainie i Rasii, radziej — u Biełarusi.
Ilustracyjny zdymak. Fota: «Naša Niva»
Varta dadać: pobač z realnymi prahramami, dzie pašpart abychodzicca ŭ sotni tysiač jeŭra, internet zabity abjavami, što abiacajuć hramadzianstva ES usiaho za niekalki tysiač. Za hetym stajać zvyčajnyja machlary, jakija padmanvajuć užo nie dziaržavy, a naiŭnych ludziej, hatovych pavieryć, što jeŭrapiejski pašpart možna kupić pa canie topavaha smartfona.
Admietna, što da 2023 hoda krainaj, jakaja taksama vydavała hramadzianstva rasijanam, naprykład, za inviestycyi ci za biezzvarotny ŭznos u dziaržfond 100 tysiač jeŭra, była Čarnahoryja. Hramadziankaj hetaj krainy, jak niadaŭna vyśvietliłasia, źjaŭlajecca rasijskaja prapahandystka Kaciaryna Andrejeva. Ale, u adroźnieńnie ad Sierbii i Bośnii i Hiercahaviny, hetaja bałkanskaja kraina prysłuchałasia da parad z boku ES i skasavała takuju prahramu.