«Siadzić na kamierach». Daktary raskazvajuć, jak byłyja siłaviki ŭ administracyi paliklinik i balnic ich kantralujuć
U miedycynskich ustanovach Biełarusi praciahvajuć uzmacniać kantrol za śpiecyjalistami. Niekatoryja daktary ŭ vyniku admaŭlajucca ad padpracovak.
Ilustracyjny zdymak. Fota: «Naša Niva»
Pavodle infarmacyi Fondu miedycynskaj salidarnaści Bymedsol, pasada namieśnika pa biaśpiecy ŭ miedycynskich ustanovach pačała źjaŭlacca z 2021 hoda. Na jaje, jak praviła, traplajuć nie miedyki, a byłyja siłaviki.
Hetaja pasada była ŭviedziena dla ŭzmacnieńnia kantrolu, u tym liku za kadravaj palitykaj.
Adna z zadač — vyjaŭleńnie niełajalnych supracoŭnikaŭ i pravierka novych kadraŭ pry pracaŭładkavańni. Pa fakcie mienavita namieśnik hałoŭnaha doktara pa biaśpiecy kančatkova vyrašaje, prymać čałavieka na pracu ci nie. Naturalna, što najpierš jon aceńvaje nie prafiesijnyja zdolnaści, a łajalnaść režymu.
U niekatorych ustanovach takuju pasadu ŭviali tolki niadaŭna. I daktary, aproč ideałahičnych pravierak, sutyknulisia jašče z adnoj prablemaj.
«Siadzić na kamierach i kantraluje ŭsie pierasoŭvańni»
Doktarka z adnoj z balnic dzielicca situacyjaj.
«U nas taki čałaviek źjaviŭsia hetaj viasnoj. Prynamsi z taho, što my ŭsie ŭžo paśpieli adčuć, — jon siadzić na kamierach i kantraluje ŭsie pierasoŭvańni pa dyspansiery. Kali niechta z daktaroŭ spaźniŭsia na pracu ci, naadvarot, syšoŭ raniej, to jon adrazu sihnalizuje pra heta zahadčyku adździaleńnia abo hałoŭnamu doktaru, a tyja ŭžo musiać pryniać miery», — tłumačyć surazmoŭca.
Sa słoŭ doktarki, čałaviek na novaj pasadzie — były kadebešnik, tamu jaho bajacca.
Strohi kantrol prysutnaści doktara na pracoŭnym miescy ŭžo pryvioŭ da kanfliktaŭ. Reč u tym, što ŭ balnicy niedachop śpiecyjalistaŭ, tamu tam zacikaŭleny, kab miedyki brali dadatkovuju nahruzku i pracavali na 1,25—1,5 staŭki. Inakš niama jak. Ale adsiedžvać pa 10-12 hadzin, kali z abaviazkami spraŭlajucca chutčej, nie patrabujuć. Były siłavik u administracyi — naadvarot: patrabuje prysutničać ad zvanka da zvanka. Praz heta niekatoryja daktary admovilisia ad padpracoŭki.
Ilustracyjny zdymak. Fota: Jose Colon Anadolu Agency via Getty Images
«Heta tolki abvastryła prablemu z deficytam kadraŭ, ale zatoje ŭsie ciapier siadziać na pracy ad zvanka da zvanka.
Śpiecyjalistaŭ nie chapaje, mnohija pracujuć na 1,5 staŭki, i ich niama kim zamianić. Doktar svaje abaviazki vykonvaje, ale naturalna, što nie pravodzić štodnia na pracy pa 12 hadzin».
Miedyk upeŭniena, što čym horš buduć umovy pracy ŭ dziaržaŭnych ustanovach, tym bolš daktaroŭ budzie pierachodzić u pryvatnyja miedcentry.
Niekalki daktaroŭ admovilisia ad dadatkovaj nahruzki
Doktarka ahulnaj praktyki ŭ paliklinicy kaža, što ŭ ich uzmacnili kantrol za piersanałam z kanca minułaha hoda.
«Paśla taho, jak daktaram pačali pavyšać zarobki, to i patrabavać stali našmat bolš. Łohika ŭ ich prasočvajecca takaja: što kali vam ciapier płaciać bolš, to my z vas ździarem try škury», — kaža žančyna.
U ich paliklinicy padobnaja situacyja z padpracoŭkami miedykaŭ. Mnohija daktary ahulnaj praktyki pracujuć nie na staŭku, a na 1,25—1,5 staŭki, što dazvalaje im atrymlivać bolš-mienš hodnuju zarpłatu. Administracyja ŭ hetym taksama zacikaŭlena.
«Adzinki nie chapaje, tamu ŭčastak dzielać pamiž dvuma daktarami. Adzin biare bolš hadzin pryjomu, a druhi — vykliki. Raźmiarkoŭvać namahajucca tak, kab nahruzka ŭ abodvuch była plus-minus adnolkavaja», — tłumačyć doktar.
U vypadku, kali lekar pracuje na 1,5 staŭki, to jahony pracoŭny dzień musić doŭžycca 12 hadzin, častku ź jakich jon pravodzić na pryjomie, a častku — chodzić ci jeździć pa vyklikach.
«Kali heta nie siezon, kali ludzi chvarejuć mienš, to doktar moža paśpieć adsiadzieć pryjom i absłužyć usie vykliki nie za 8 ci 12 hadzin, jak pałožana na staŭku, a za 7 ci, naprykład, 10. Kali niejkich niezavieršanych spraŭ nie zastałosia, to lekar idzie dadomu, choć farmalna musić viarnucca ŭ palikliniku i tam dasidžvać svoj pracoŭny čas», — tłumačyć śpiecyjalist.
Ilustracyjny zdymak. Fota: «Naša Niva»
Administracyju (za vyklučeńniem taho samaha namieśnika pa biaśpiecy) taki raskład zadavalniaje, bo jany sami miedyki i vydatna razumiejuć, jak pracuje hetaja sistema.
«U pieryjad pikavaha zachvorvańnia my prymajem za pryjom našmat bolš ludziej, čym musim, toje samaje i z vyklikami».
Kali z prychodam namieśnika pa biaśpiecy ad daktaroŭ pačali patrabavać siadzieć pa 12 hadzin, to niekalki čałaviek admovilisia ad dadatkovaj nahruzki.
«Naturalna, što ŭsim stała tolki horš. Hałoŭny doktar, zahadčyki — usie razumiejuć, što ŭ takim vypadku pracavać budzie niama kamu. Padajecca, im udałosia danieści hetuju pazicyju svajmu novamu «kalehu».