Mielnikava rychtavała svajo źniknieńnie i manipulavała atačeńniem. Pakul niajasna, ci dziejničała jana pa kamandzie ź Minska
Źnikaje žančyna z hrašyma — 120, a moža, navat 170 tysiačami jeŭra. Ale, u adroźnieńnie ad ramanaŭ Ahaty Kryści, u hetaj historyi niama zabojstva — prynamsi, pakul. Karcinu padziej nam davodzicca adnaŭlać pa frahmientach — jak archieołahi amfaru pa čarapkach.
Anžalika Mielnikava i vaskovaja skulptura Džejmsa Bonda. Fota ź jaje staronki ŭ FB
«Jany ž tam zhubili hetuju śpikierku. Znajści nie mohuć! Znajści nie mohuć. Dyk znajdzicie chacia b!» — jak razumieć hetyja słovy Alaksandra Łukašenki 12 krasavika na subotniku? Łukašenka taksama nie viedaje dakładna, dzie Anžalika Mielnikava? Ci jon viedaje? Ci jana ŭ jaho ŭ rukach?
Kab adkazać na hetyja pytańni, my dahetul nie viedajem hałoŭnaha — maršrutu pieralotaŭ Anžaliki Mielnikavaj i jaje dziaciej. Polskim śpiecsłužbam, napeŭna, hetaja infarmacyja dastupnaja, ale jany čamuści nie ličać patrebnym jaje apubličyć. Žurnalisty-rasśledavalniki zmohuć hetyja danyja atrymać chiba što praź miesiac-dva. Hetaja infarmacyja adrazu rasstavić mnohija kropki nad «i». Pry adnym «ale»: kali pačynajučy ź niejkaha punktu Ch Mielnikava nie pačała padarožničać pad niejkim trecim pašpartam. A takoha ŭ hetaj historyi taksama nielha vyklučać.
Adnak my adkapali ŭžo trochi čarapkoŭ, jakija dazvalajuć nam adnavić niekatoryja momanty ź vialikaj dastaviernaściu.
Pa infarmacyi polskich śpiecsłužbaŭ — ale ŭ pierakazie Paŭła Łatuški — Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.
Adrazu zahadka. Pa słovach Łatuški, Mielnikava vylecieła z Polščy ŭ Łondan razam z dočkami. Ale, pa słovach muža, ŭ vyniku dzieci ź im:
«— Dzieci z vami?
— Tak, sa mnoj.
— I vy ŭ Biełarusi?
— Tak».
Ci praŭdu kaža muž? Ci dzieci sapraŭdy ŭ Biełarusi? Chutčej, tak.
Davodzicca vieryć jamu i maci Mielnikavaj, jakaja paćviardžaje, što ŭnučki ŭ jaje. Ciažka ŭjavić sabie, kab niemaładyja baćki Anžaliki, niepryvučanyja da ŭvahi zboku, na chadu chłusili, a žurnalisty nijak nie adčuli ŭ ich słovach niaŭpeŭnienaści i sproby padmanuć. Da taho ž krynicy i «Lusterka», i «Jeŭraradyjo» śćviardžali, što bačyli ŭ Niaśvižy małych Taćcianu i Hannu razam z baćkam.
Baćki Anžaliki kažuć, što nie viedajuć, dzie ich dačka. Ale pry hetym jany nie bjuć u zvany, nie abviaščajuć Anžaliku ŭ vyšuk — a prosta nibyta pakorliva pryniali situacyju, što dačka źnikła nieviadoma dzie. Chaj sabie pra jaje nie chvalujecca były muž — nichto nie viedaje, jakija škilety zachoŭvalisia ŭ šafie sužencaŭ. Ale kab los dački nie nadta cikaviŭ i jaje rodnuju maci? Dziŭnaja situacyja, nie ŭłaścivaja adnosinam u biełaruskich siemjach.
«Dzieciam kažu, što ŭ kamandziroŭcy, i ŭsio», — raskazvaje pra ŭnukaŭ Aksana Mikałajeŭna.
Anžalika Mielnikava. Fota: Adam Burakowski / East News
Ci što?
Jarkaja błandzinka, 38-hadovaja Anžalika Mielnikava svaim vobrazam i ŭśmieškaj u padcisnutych končykach vusnaŭ nahadvała Miledzi z savieckaj ekranizacyi «Troch muškiecioraŭ». Pra jaje muža ŭ toj ža čas kažuć, što ŭ jaho vybuchovy tempieramient i reŭnaść jak u D'Artańjana. Kaleha-žurnalist ź inšaha vydańnia raskazaŭ nam, što padčas sustrečy ź Mielnikavaj pobač apynuŭsia jaje były muž.
— Jon hladzieŭ na mianie niejkim dzikim pozirkam. Pavodziŭ jon siabie dziŭna. Anžalika navat vybačyłasia, skazała, kab ja nie źviartaŭ uvahi, što jon vielmi raŭnivy. I ź im zdarajucca takija prystupy.
Tamu znajomyja pary spačatku nie adkidali nijakaj viersii.
Baćki Mielnikavaj zajavili, što jaje były muž ničoha im nie kaža.
«Moža, chvalavać nie choča, ci što. Nie viedaju. Heta moj były ziać, razumiejecie?»
Hołas maci padaŭsia žurnalistu «Jeŭraradyjo» pryhniečanym.
Darečy, ci sapraŭdy jon «były»? Pra heta pahavorym nižej.
Pavodle słoŭ baćki Anžaliki, apošni raz jany razmaŭlali ŭ lutym — jon vinšavaŭ dačku z dniom narodzinaŭ. Dzie Anžalika ciapier, Artur Mikałajevič nie viedaje.
Z rachunku fondu źnikli ŭsie hrošy?
Adnak ramantyčnaja viersija pra rolu ci vinu muža ŭ źniknieńni Mielnikavaj raźbivajecca ŭ dva fakty.
Adzin ź ich — pavodziny Mielnikavaj paśla adlotu z Polščy, druhi — źniknieńnie hrošaj z rachunkaŭ Białoruś Liberty. Apošniamu pakul niama dakumientalnych paćvierdžańniaŭ, ale pra toje nam skazali prynamsi try infarmavanyja krynicy, i pra toje samaje sa spasyłkaj na krynicu ŭ Ministerstvie zamiežnych spraŭ Polščy paviedamlaŭ «Biełsat».
Dla atrymańnia hrantaŭ na prajekty, jakija jana administravała, u Mielnikavaj byŭ svoj fond — Białoruś Liberty. Z hetaha rachunku, imavierna, i źnikła vialikaja suma. Adny kažuć ab prykładna 120 000 jeŭra, inšyja — pra 170 000 jeŭra. Zrešty, heta ŭsio słovy, ciažka kazać niešta dakładnaje, kali my nie bačym dakumientaŭ. A raptam tam jašče bolš?
Niešta ź ich — biudžet Kaardynacyjnaj rady, rešta — hrošy, sabranyja na svaje mety «Kibierpartyzanami». Źniać hrošy — ci pieravieści na niejki inšy rachunak — mahła tolki sama Mielnikava. Nichto inšy prava zdymać hrošy nie mieŭ.
U naziralnuju radu fondu, jaki stvaraŭsia napačatku ŭ intaresach «Kibierpartyzanaŭ», uvachodziła jašče ich pradstaŭnica Juljana Šemietaviec. Heta dało joj mahčymaść ciapier pryznačyć u Białoruś Liberty dyrektara — byłoha vajskoŭca Viktara Paciechina, jaki staŭ viadomym paśla taho, jak skinuŭ kaktejli Mołatava na bazu minskaha AMAPa i vyjechaŭ ź Biełarusi. Ale, maŭlaŭ, tolki kali Paciechin vierniecca ź niejkaj zapłanavanaj pajezdki, jon zmoža atrymać dostup da dakumientaŭ. I tolki tady «Kibiery» buduć mieć infarmacyju, kudy i ŭ jakija dni ź jaje rachunka byli vyviedzienyja hrošy.
Majem adčuvańnie, što i «Kibierpartyzany», i Pavieł Łatuška čamuści nie paviedamlajuć pra ŭsio, što viedajuć, adciahvajuć hety momant.
Mielnikava ciahnuła čas
Klučavoje, što źviartaje ŭvahu — Anželika Mielnikava rychtavała svajo źniknieńnie i manipulavała atačeńniem. Heta vynikaje z taho, jak jana kamunikavała z paplečnikami ŭ sakaviku.
Mielnikava, paśla taho jak jana pakinuła Polšču, vychodziła na suviaź i abiacała sustrečy roznym ludziam u Varšavie. Paśla jana ich pieranosiła abo całkam admaŭlałasia. Jana spasyłałasia to na chvarobu, to na adsutnaść času. Pry hetym Mielnikava ŭžo niekalki tydniaŭ nie była ŭ Polščy, ale nie kazała pra heta. Jana razmaŭlała ź siabrami KR, z pradstaŭnikami kamandy Łatuški, ź ludźmi, jakim musiła zapłacić zarobki z atrymanaha hrantu. Heta byli razmovy i praz Zum ź videa, i hołasam.
A ci moža być, što zamiest jaje ź ludźmi razmaŭlaŭ avatar jaje hołasu, stvorany štučnym intelektam? Ci što jana havaryła pad kantrolem trecich asob? Małarealistyčna. Aŭtentyčnaść razmoŭ nie vyklikała pytańniaŭ u surazmoŭcaŭ, bo Mielnikava detalova adkazvała na pytańni, čaho štučny intelekt chiba što padrabić jašče nie zdolny. I ŭ surazmoŭcaŭ nie stvaryłasia ŭražańnia, što Mielnikava była zastrašanaja, pryhniečanaja, havoryć nie svaimi słovami.
Jana abiacała pryjści ŭ ofis, chacia była daloka za miažoj. Jana abiacała, što nieŭzabavie pačnie płacić zarobki z hrantu, jaki atrymała na rachunak svajho fondu. Jana prosta ciahnuła čas.
Voś hetyja jaje pavodziny ŭ sakaviku — adlot u Łondan pry stvareńni iluzii taho, što jana ŭ Varšavie — robiać imaviernaść vykradańnia śpiecsłužbami mizernaj.
Anžalika Mielnikava ŭ Łondanie. Fota ź jaje staronki ŭ FB
Ci mieła sens źnikać z hrašyma
«Kali nie viedaješ, o co chodzi, to peŭna chodzi o pieniondze», — kaža polskaja prykazka.
Ludzi ź blizkaha atačeńnia Mielnikavaj, ź jakimi havaryła «Naša Niva», schilajucca da dumki, što Mielnikava vyjechała ŭ ekzatyčnuju krainu — mahčyma, z hrašyma. U śviecie jość kala dvaccaci krain, jakija nie vydajuć Polščy polskich hramadzianaŭ. Siarod ich, skažam, Uźbiekistan, Jamajka, Kosta-Ryka, Balivija.
Adznačym jašče raz, što Mielnikava — sa słovaŭ Łatuški — spačatku skiravałasia ŭ Łondan. Asablivaść Brytanii ŭ tym, što na vylecie pahransłužba pašpartoŭ nie praviaraje, heta robić tolki avijakampanija. Heta spraščaje mahčymaść vyletu pa inšym pašparcie, čym ty ŭjazdžaŭ. Pravaachoŭnyja orhany postfaktum vyśvietlać, kudy i pad jakim pašpartam vylataŭ čałaviek — ale ŭ toj kankretny momant adsačyć jaho maršrut ciažej. Tym bolš kali ŭ Łondan zalatała Mielnikava, a, skažam, z Łondana ŭ Karakas i z Karakasa ŭ Dubaj (my heta tut kažam umoŭna) paśla vylatała ŭžo niejkaja Makaviejeva.
Ci moža być, što Mielnikava adbyła ŭ nieviadomym kirunku z hrašyma, kab pačać ułasnaje žyćcio z čystaha arkuša?
Davajcie ŭzvažym, što takoje 120 ci 170 tysiač jeŭra. U niebahatych krainach na hetyja hrošy možna kupić kvateru i zastaniecca jašče na šmat hadoŭ žyćcia.
Ale heta nie niejkaja kaśmičnaja suma ŭ sučasnym śviecie.
Nie dla namieśnicy hiendyrektara «Koka-Koły», jakaja vydatna viedaje zamiežnyja movy, adukavanaja i adekvatnaja, jak apisvajuć ludzi ź jaje atačeńnia.
Ci budzie taki čałaviek pačynać žyćcio za śvietam, viedajučy, što ciabie buduć šukać za kradziež i niekali ž znojduć, rana ci pozna? Dy jašče i biez harantyi taho, što znoŭ sustreniešsia ź dziećmi, jakija zastajucca ŭ Biełarusi — kali prymajem za praŭdu, što jany nasamreč z baćkam.
Takoje moh by zrabić avanturyst — ale nie byłaja mieniedžarka vysokaha ŭzroŭniu z dvuma dziećmi, starymi baćkami i hramadskim statusam.
Heta ŭsio ž varjacki ŭ svajoj nieracyjanalnaści płan — kali tolki ty nie vykonvaješ zadańnie śpiecsłužbaŭ.
Anžalika i Andrej Mielnikavy ź dziećmi. Fota sa staronki Anžaliki Mielnikavaj u fejsbuku
Tajna razvodu
Darečy, my nie možam śćviardžać napeŭna, byŭ razvod Mielnikavaj z mužam sapraŭdnym ci fiktyŭnym.
Aficeru z «Bajpoła», ź jakim havaryła «Naša Niva» zdavałasia, što jon byŭ fiktyŭnym. «Mnie zdałosia tady, što jany raźvialisia, kab muž moh dalej jeździć u Biełaruś — nie viedaju, dla čaho jamu heta treba», — kaža aficer.
Tak, heta fakt, što były muž śpikierki Mielnikavaj Andrej praciahvaŭ jeździć u Biełaruś — redka chto sa svajakoŭ dziejačoŭ apazicyi tak robić, bo tak ty lohka možaš stać abjektam represij ci šantažu. I Mielnikaŭ kančatkova vyjechaŭ z Polščy ŭ Biełaruś 3 sakavika, praz šeść dzion paśla adlotu Anžaliki.
Niahledziačy na farmalny razvod, Mielnikava z mužam u Varšavie praciahvali žyć razam. Pra heta nam raskazali ludzi, jakija asabista byvali ŭ ich kvatery ŭ Varšavie i bačyli tam Andreja Mielnikava. Pra mužčynu, jaki žyŭ ź Mielnikavaj, kazali i susiedzi ŭ razmovie z «Jeŭraradyjo».
Andrej Mielnikaŭ śćviardžaje, što dočki razam ź im. Pravieryć hety fakt niemahčyma. Kali jon kaža praŭdu, to niezrazumieła, jak dočki mahli apynucca ź im, kali vylecieli z Anžalikaj ŭ Łondan? Mahčyma, jon ci babula vylatali pa ich u niejkuju treciuju krainu.
Andrej Mielnikaŭ praciahvaŭ jeździć u Biełaruś. Fota ź jaho sacyjalnych sietak
Takim čynam, niezrazumieła, jakuju rolu ŭ hetaj historyi hraŭ Andrej Mielnikaŭ.
Ale paŭtorym: Andrej Mielnikaŭ adnaznačna byvaŭ u Biełarusi paśla taho, jak ich siamja pierajechała ŭ Polšču — I ciapier Mielnikaŭ u Biełarusi. I z varšaŭskaj kvatery siamja vyjechała z kancami, źnik navat dziciačy samakat.
Anžalika Mielnikava. Fota ź jaje staronki ŭ FB
Adkul uvohule ŭziałasia Mielnikava?
Chto takaja hetaja Mielnikava? Hetym pytańniem zadalisia navat my ŭ Redakcyi, kali pačuli jaje imia jak kandydatki ad frakcyi Łatuški na pasadu novaj śpikierki Kaardynajcyjnaj rady. My jaje nie viedali da taho.
Ź Biełarusi jaje siamja vyjechała zusim rana — u vieraśni 2020-ha. Spačatku jany pierajechali ŭ Kijeŭ, a zatym u Polšču pa IT-prahramie Poland. Business Harbour.
U Mielnikavaj jość polskija karani, praź jakija jana adrazu atrymała pastajanny dazvoł na žycharstva.
Niekalki hadoŭ Mielnikava supracoŭničała z Paŭłam Łatuškam. Spačatku jak pierakładčyca i aŭtarka tekstaŭ, paśla — zaniałasia prajektnym mieniedžmientam i stała daradcaj pa stratehičnych pytańniach.
U Kaardynacyjnaj radzie Mielnikavu ličyli «čałaviekam Łatuški», ich adnosiny nazyvali vielmi blizkimi.
Sama Mielnikava nie była supierpubličnaj asobaj z vostrym jazykom ci lidarskaj charyzmaj. Jana była vykanaŭcam, a nie palitykam. Chutčej, typ technakrata ad apazicyi: finansavyja tablicy, damovy na apłatu pracy, praca ź ličbami. Kalehi Mielnikavaj adznačajuć jaje skancentravanaść na pracy, adkaznaje staŭleńnie da abaviazkaŭ. Anžalika nie impulsiŭnaja, a racyjanalnaja, choć i emacyjnaja — tak apisvajuć jaje znajomyja.
Anžalika Mielnikava. Fota ź jaje staronki ŭ FB
Sakrety Kaardynacyjnaj rady
Kaardynacyjnaja rada — nie taja arhanizacyja, jakaja razdaje karty ŭ apazicyi. Hałoŭny sakret Kaardynacyjnaj rady ŭ tym, što ŭ jaje niama nijakich sakretaŭ.
KR — heta, pa vialikim rachunku, dyskusijny kłub, jaki ničoha nie vyrašaje. Trenirovačnaja placoŭka dla tych, chto bačyć siabie ŭ palitycy.
Śpisy siabroŭ hetaj arhanizacyi i tak viadomyja śpiecsłužbam, suprać usich ich zaviedzienyja kryminalnyja spravy. Dakumienty, jakija jana abmiarkoŭvaje, — heta dekłaracyi ab namierach.
Jość takaja hulnia ŭ vajnu — «Zarnica», a jość takaja hulnia ŭ parłamient — «Kaardynacyjnaja rada».
Tak, dobraachvotnaje źniknieńnie Mielnikavaj — heta reputacyjny ŭdar pa apazicyi, ale praktyčnaj niebiaśpieki dla KR jano nie niasie.
Śviatłana Cichanoŭskaja, Pavieł Łatuška i Anžalika Mielnikava ŭ Varšavie na šeści pratestu suprać falsifikacyi vybaraŭ u Biełarusi, 26 studzienia 2025 hoda. Fota: Vasily Krestyaninov SOPA Images LightRocket via Getty Images
Sakrety kibieraŭ
A voś što datyčyć «Kibieraŭ», śmiarotnych vorahaŭ režymu, to tut stupień škody možna budzie zrazumieć, tolki kali stanie jasna, ci mieła Mielnikava kanfidencyjnuju infarmacyju pra aktyvistaŭ hrupoŭki ci jaje ananimnych udzielnikaŭ unutry Biełarusi, ci jana kantaktavała tolki z publičnymi asobami «kibieraŭ», jakija mieli źviestki pra šarahovych «partyzanaŭ» i ich fundataraŭ. U kožnym razie jana jak finansist viedaje sumy i daty vykanańnia pieravodaŭ kibieram — navat za hetuju infarmacyju śpiecsłužby hatovyja byli b na mnohaje.
Ale kali Mielnikava pracavała na łukašenkaŭskija śpiecsłužby, joj nie treba vyjazdžać, kab hetuju infarmacyju pieradać u centr.
Vyjazdžać jaje mahli zmusić tolki inšyja matyvy.
Ci moh KDB vykraści Mielnikavu?
Tearetyčna moh, ale niama nijakich faktaŭ, jakija b pra heta śviedčyli.
Naadvarot, jość usie padstavy dumać, što jana sama, pa svajoj voli, palacieła spačatku ŭ Łondan, a paśla, imavierna, u niejkuju treciuju krainu — nichto z kaleh nie viedaje našto.
Vykradańnie čałavieka — nie samaja prostaja apieracyja. Tearetyčna Mielnikavu mahli vymanić u tuju treciuju krainu — ale, miarkujučy pa apisańni jaje charaktaru, jana nie taki čałaviek, kab im možna było lohka manipulavać. Hałoŭnaje, jaje pavodziny ŭ sakaviku piarečać viersii pra vykradańnie. Chutčej, jana sama zamiatała ślady — čamu?
Anžalika Mielnikava na kanfierencyi «Novaja Biełaruś» 3 žniŭnia 2024 hoda
Ci moža Mielnikava być u Biełarusi?
Moža — abo siadzieć u SIZA KDB, abo, jak ciapier časam robicca, u fiešenebielnym numary hateli «Jeŭropa», niedzie pobač ź Juryjem Ziańkovičam. Ale pakul niama nijakich faktaŭ, jakija b pra heta śviedčyli.
Raniej hałoŭnym arhumientam na karyść taho, što jana ŭ Biełarusi, było toje, što jaje telefon 19 sakavika nibyta byŭ tam aktyŭny. Paźniej vyjaviłasia, što havorka nie pra telefon, a niejkuju inšuju pryładu. Taja pryłada tearetyčna mahła być i ŭ byłoha muža. Abo joj mahła skarystacca sama Anžalika pry dapamozie VPN z treciaj krainy.
Prapahandysckija kanały sprabujuć padahravać skandał, publikujučy dakumienty Kaardynacyjnaj rady. Ale hetyja dakumienty byli znojdzienyja ŭ pryładach aryštavanaha ŭ Vjetnamie byłoha kalinoŭca Vasila Vieramiejčyka.
Ale kali Mielnikava nie ŭ Biełarusi prosta ciapier, nie vyklučana, što jana moža apynucca ŭ Biełarusi praź niejki čas — kali hetaja hulnia viadziecca ź Minska.
.
Anžalika Mielnikava, Śviatłana Cichanoŭskaja, Alena Žyvahłod, Alaksandr Dabravolski i Pavieł Łatuška na kanfierencyi «Novaja Biełaruś» 3 žniŭnia 2024 hoda
Udar pa Łatušku
Vidavočnuju škodu hetaja historyja nanosić Paŭłu Łatušku.
Anžalika Mielnikava była jaho prateže. Heta jon jaje zaŭvažyŭ, jon u jaje pavieryŭ, ličyŭ, što ŭ jaje jość palityčny patencyjał. Zrabiŭ svajoj blizkaj supracoŭnicaj, jana pracavała ŭ jaho Narodnym antykryzisnym upraŭleńni. Jana biassprečna viedała ŭsiu ŭnutranuju kuchniu arhanizacyi i jaje tajamnicy. A moža, i tajamnicy Łatuški. A Łatuška dla režymu — adzin z hałoŭnych vorahaŭ za miažoj.
Što b ni zdaryłasia ź Mielnikavaj, jaki b ni byŭ kaniec hetaj historyi, jana kidaje cień i na kadravy niuch Łatuški, i na jaho publičny imidž.
Źviartaje ŭvahu, što historyja ź Mielnikavaj zdaryłasia napiaredadni mahčymaha razhladu ŭ Haazie spravy suprać Łukašenki. Dakładnaja data pakul nieviadoma, ale zajava suprać Łukašenki była padadzienaja letaś u vieraśni.
Kamanda Łatuški padała ŭ Haahu materyjały, pavodle jakich, z maja 2020 hoda pa ŭkazańni vyšejšych słužbovych asob Biełarusi ŭ adnosinach da nasielnictva krainy ŭčyniajucca złačynstvy suprać čałaviečnaści, uklučajučy departacyju, pieraśledy i inšyja biesčałaviečnyja akty.
U Łatuškavaj linii abvinavačvańnia małyja šancy dasiahnuć pośpiechu, ale dla samoha Łukašenki pa niejkich pryčynach hetaja sprava vielmi adčuvalnaja. Jon kazaŭ publična pra hety praces 17 vieraśnia, vystupajučy pierad udzielnikami śviatkavańnia Dnia narodnaha adzinstva. Heta było jašče da taho jak Pavieł Łatuška zrabiŭ publičnaj svaju inicyjatyvu i zavioz dakumienty ŭ Haahu. A paśla narakaŭ na hetuju inicyjatyvu padčas sustrečy ź Dzianisam Pušylinym.
Źjaŭleńnie Mielnikavaj narodu ŭ toj čas, kali ŭ Haazie pačnucca słuchańni, adciahnuła b miedyjnuju ŭvahu ad dyskusij pra złačynstvy Łukašenki.
Cui prodest
Miarkujučy pa śviedčańniach ludziej z Kaardynacyjnaj rady, Anžalika Mielnikava źnikła akurat tady, kali na rachunak Białoruś Liberty pryjšoŭ pieršy tranš hrantu na KR.
Fantastyčny iracyjanalny kradziež ź iluzornym spadziavańniem rastvarycca na prastorach Łacinskaj Amieryki ci Azii?
Heta nie adpaviadaje psichałahičnamu partretu Mielnikavaj — a jana i detektar chłuśni prachodziła ŭ 2022 hodzie, miž inšym. Ni adzin čałaviek z atačeńnia Mielnikavaj, ź jakim my havaryli, da jaje źnikańnia nie dapuskaŭ dumki, što jana zdolnaja na taki płan. Naadvarot, jaje ličyli čałaviekam idejnym i pryncypovym.
My možam pamylacca, ale pakul adzinaje racyjanalnaje tłumačeńnie hetaj situacyi — kali dapuścić, što Mielnikava zhulała na karyść Łukašenki. Ad pačatku jana była ahientkaj, ci niečym jaje zvabili paźniej, ci zmusili šantažom, chto viedaje — ale jana syhrała ŭ ich hulniu. Tady i jaje źniknieńnie z hrašyma nabyvaje łohiku: «śpikierka apazicyjnaha parłamienta źnikła z zachodnim hrantam». Heta nie tolki dematyvacyja dla biełarusaŭ, heta najpierš kampramietacyja biełaruskaj apazicyi ŭ vačach zachodnich struktur.
Heta była b pieramoha tych, chto choča, kab Zachad spyniŭ padtrymku biełaruskaj apazicyi. A heta treba Minsku i Maskvie. Ale jość siły i na Zachadzie, jakim toje było b vyhadna. Na fonie dziejańniaŭ Donalda Trampa, jaki skaračaje padtrymku demakratyi ŭ śviecie, heta cudoŭny arhumient dla rasčaravanych donaraŭ, što jon maje racyju. «Hladzicie, kaho my finansujem!».
Niechta moža spytać, a čamu b u takoj hipotezie joj adrazu z Łondana nie pieralacieć u Biełaruś?
Akurat kali b Mielnikava adrazu abjaviłasia ŭ Biełarusi, tady historyju ciažej było b pradać jak naturalnuju, u joj by była b vidavočnaja ruka KDB, jaki padmanam abo siłaj zmusiŭ Mielnikavu pryjechać. Heta byŭ by Pratasievič numar dva, Pratasievič u spadnicy. Tady b usia historyja straciła šarm składanaj. A ŭ raskładzie, jaki my majem, usio maksimalna zabłytana i teatralna, to-bok — nieadnaznačna.
My jašče možam ubačyć prašeńnie ab pamiłavańni da Łukašenki, pačuć historyju «uciokaŭ» ad polskich śpiecsłužbaŭ praz pałovu śvietu.
Paŭtorymsia, pakul heta našy dapuščeńni na asnovie ličanych čarapkoŭ. Ale heta i adzinaje racyjanalnaje tłumačeńnie, jakoje na siońnia składajecca.
Tak, da jaho jość pytańni, na jakija składana adkazać. Kali Mielnikava zasłanka ad pačatku abo jaje ŭdałosia zavierbavać, to ci varta achviaravać ahientkaj z takim patencyjałam dziela adnoj mety? Ci nie varta było b pracavać nad jaje prasoŭvańniem? Heta patencyjna jašče bolš kaštoŭnaja «kracicha». Abo było štości, što zmusiła śpiešna zharnuć jaje pracu?
Nieracyjanalnyja viersii taksama nielha vyklučać. Šalonaje novaje kachańnie? Byvaje, viadoma, što pačućci zmušajuć žančyn kvatery pradavać i słać pieravody akaŭntu Dy Kaprya ŭ fejsbuku. Ale heta tak nie padobna da Mielnikavaj, jakuju viedali ludzi.
Dapuścić, što taki racyjanalny čałaviek, jak jana, raptam kidaje ŭsio: i siamju, i pracu — i z «pasaham» hramadskich hrošaj vylataje prosta tak niemaviedam kudy ŭ śviet da kachanka, a jaje były muž ź dziećmi adnačasova kirujecca ŭ Biełaruś, składana. Jašče składaniej zrazumieć, čamu pry takim varyjancie Mielnikavaj było lacieć ź dziećmi ŭ Łondan — kab jany paśla trapili ŭ Biełaruś kružnym šlacham. Kali ty kidaješ siamju, to ty jaje kidaješ, a nie biareš z saboju.
Mielnikavu aryštavali ŭ treciaj krainie, a dziaciej addali mužu? Hetuju viersiju robiać niepraŭdapadobnaj pavodziny Mielnikavaj u sakaviku.
Narešcie, jašče adno niajasnaje pytańnie — dla čaho Mielnikava i raniej lotała ŭ Łondan? Adkaz na jaho moh by stać klučom.
I jašče adno pytańnie: ci była Mielnikava ŭ adnosinach ź niekim ź lidaraŭ apazicyi? Takija čutki chodziać, nazyvajuć navat dva imieni — ale takija čutki supravadžajuć usich pryhožych svabodnych žančyn i mužčyn. Ale kali i była, to heta byli pačućci, ci płan, ci zadańnie?
Polskija śpiecsłužby nie śpiašajucca, i heta dziŭna
Palaki vielmi ścipła kamientujuć źniknieńnie Mielnikavaj. Publična heta rabiła pakul Ministerstva ŭnutranych spraŭ. Ale aprača infarmacyi pra jaje vyjezd z Polščy ničoha nie razhałošvajecca, častkova infarmujuć tolki Łatušku. Heta dziŭna, uličvajučy, što hramadzianku Polščy mahli vykraści śpiecsłužby varožaj dziaržavy.
Varšava paćvierdziła, što Mielnikava vyjechała ŭ kancy lutaha ŭ Łondan. Niemahčyma ŭjavić, kab brytanskija śpiecsłužby admovili, naprykład, polskim pradstavić infarmacyju pra jaje dalejšy maršrut. Tady čamu nichto nie kaža, kudy jana nakiravałasia z Łondana?
Pavodziny palakaŭ dziŭnyja. Mahčyma, pryčyna tut u prezidenckich vybarach u mai i niežadańni ŭrada ŭ Varšavie mieć skandał napiaredadni ich. Kali b jaje źniknieńnie było źviazanaje ź siamiejnymi pryčynami, asabistymi žyćciovymi pavarotami, to ničoha nie zaminała palakam by tak i skazać, zaklikaŭšy adčapicca ad pryvatnaha žyćcia svajoj hramadzianki.
Zvyčajna tajamničyja źniknieńni ŭ Polščy pryciahvajuć uvahu i miedyja, i palitykaŭ. Tut i pahatoŭ zdareńnie źviazanaje z palitykaj, dyktatarami, varožymi śpiecsłužbami. Ale zacikaŭlenaść spravaj u Polščy mizernaja. Ci nie tamu, što polskija śpiecsłužby viedajuć, dzie Mielnikava?
«Razhladajecca niekalki viersij»
Polskaja prakuratura pakul nie adkidaje nijakaj viersii.
«Z najaŭnych na hety momant źviestak nie vynikaje adnaznačna, što zdaryłasia sa źnikłaj. Razhladajecca niekalki viersij — ad machlarstva i prysvajeńnia hrošaj z rachunkaŭ apazicyi da pracy na zamiežnuju raźviedku i navat vykradańnia zamiežnymi śpiecsłužbami», — paviedamlaje polskaje vydańnie rmf24.pl. Spravu pieradali na vyšejšy ŭzrovień, u Krajovuju prakuraturu, jakaja viadzie ŭ tym liku spravy ab špijanažy.
Kali vy viedajecie pra spravu bolš, pišycie redaktaru ŭ telehram @nn_editor abo na mejł nivanasha@proton.me. Abo tym z redaktaraŭ i žurnalistaŭ «NN», jakich viedajecie asabista.
{DONATE_PAYPAL}