Načalnica turmy ŭ Anhlii zakruciła raman ź viaźniem-narkabosam i ciapier siadzie sama
Načalnicu turmy, jakaja zaviała stasunki z bosam narkatrafiku, što siadzieŭ u turmie, jakoj jana kiravała, pryznali vinavataj pa dvuch punktach abvinavačańnia ŭ nienaležnych pavodzinach na dziaržaŭnaj pasadzie, paviedamlaje Bi-bi-si.
Kery Pieh. Fota CPS
42-hadovuju Kery Pieh nazyvali «zorkaj» pienitencyjarnaj słužby, jakaja za šeść hadoŭ padniałasia karjernymi prystupkami ad učorašniaj vypusknicy da načalnicy turmy HMP Kirkham u Łankašyy.
Ale na sudzie stała viadoma, što jana «nie hulała pa praviłach» i pačała stasunki z hałoŭnym livierpulskim złačyncam Entani Sondersanam, dapamahajučy jamu damahčysia vyzvaleńnia.
Sud prysiažnych Prestanskaha suda vyniesie vierdykt paśla dvuchtydniovaha razhladu.
Padčas suda stała viadoma, što palicyja praviała pieratrus u domie Pieh i znajšła zubnuju ščotku z DNK Sondersana.
Taksama vyśvietliłasia, što Sondersan padaryŭ Pieh, jakuju taksama pryznali vinavataj u zachoŭvańni złačynnaj majomaści, aŭtamabil Mercedes C-kłasa koštam 12 000 funtaŭ sterlinhaŭ, za jaki jon zapłaciŭ 34 kiłahramami amfietaminu.
Padčas znosin ź inšymi złačyncami Sondersan vykarystoŭvaŭ imia Džesi Pinkman — tak zvali handlara mietamfietaminam u papularnym sieryjale «Va ŭsie ciažkija».
Jon taksama byŭ viadomy pad imiem Džejms Handalfini — akciora, jaki hraŭ Toni Saprana ŭ sieryjale pra mafiju.
Na sudzie stała viadoma, što Pieh pravodziła šmat času ŭ svaim kabiniecie ź viaźniem, a ŭ kastryčniku 2018 hoda jon padaŭ prašeńnie ab časovym vyzvaleńni.
Choć takija zapyty źjaŭlajucca zvyčajnaj spravaj, isnujuć peŭnyja praviły adnosna taho, jak ich varta razhladać, i hetyja praviły načalnica turmy parušyła.
Było ŭstanoŭlena, što jana nie mieła paŭnamoctvaŭ zaćviardžać vyzvaleńnie, ale ŭmiašałasia i zaćvierdziła zajavu, nie paviedamiŭšy słužboŭcu, jaki mieŭ by jaje razhladać.
Padčas abviaščeńnia rašeńnia prysiažnych Pieh stajała, schiliŭšy hałavu, i nie reahavała.
Sudździa Hrem Noŭłz skazaŭ joj, što jana moža rychtavacca da pazbaŭleńnia voli: «U mianie niama inšaha vybaru, akramia jak adpravić vas u turmu z-za ciažkaści vašaha złačynstva».
Padčas razhladu stała viadoma, što Sondersan raspracavaŭ i zapuściŭ prahramu pad nazvaj BADD (Pieraadoleńnie ałkaholnaj i narkatyčnaj zaležnaści) dla źniavolenych u niekalkich turmach, choć na toj čas byŭ narkadyleram i kiravaŭ fabrykaj pa vytvorčaści amfietaminu.
Pieh śćviardžała, što jaje kantakt z Sondersanam adbyvaŭsia z-za jaho ŭdziełu ŭ prahramie BADD.
Ale navat členy jahonaj bandy narakali, što ich bos pravodzić zanadta šmat času ź Pieh, «daloka ad žonki i pracy».
Dajučy pakazańni na svaju abaronu, zapłakanaja Pieh śćviardžała, što jaje znosiny z Sondersanam byli «durnymi», ale nastojvała, što nie zrabiła ničoha drennaha.
Jaje advakat adznačyŭ, što jana była «naiŭnaj». Bok abvinavačańnia pryvioŭ dokazy taho, što jana pravodziła ŭsio bolš času z narkabosam pa miery taho, jak jaho dziesiacihadovaje źniavoleńnie nabližałasia da kanca.
Detektyvy vyśvietlili, što Pieh žyła šykoŭniej, čym dazvalaŭ jaje zarobak, kuplajučy dyzajnierskija juvielirnyja vyraby i vopratku, u tym liku abutak Jimmy Choo i karali Chanel.
Jany vyjavili, što, niahledziačy na dachod u 3000 funtaŭ sterlinhaŭ u miesiac, jana była ŭ daŭhach i nie paviedamiła pra try rašeńni akruhovaha suda, što źjaŭlajecca nienaležnymi pavodzinami, bo daŭhi robiać čynoŭnikaŭ uraźlivymi da karupcyi.
Jaje čatyry kredytnyja karty byli «poŭnaściu vyčarpanyja», a na jaje aščadnym rachunku było 6 piensaŭ, stała viadoma ŭ sudzie.
Barbara-Łuiza Vebster, jakaja pradstaŭlała bok abvinavačańnia, skazała, što ŭ Pieh była pierśpiektyŭnaja budučynia, ale dadała, što «Entani Sondersan staŭ jaje kracham».
«Pavodziny Kery Pieh dalokija ad taho, čaho možna było b čakać ad luboha supracoŭnika pienitencyjarnaj słužby, nie kažučy ŭžo pra takuju vysokuju pasadu, jak načalnik turmy», — adznačyŭ Teryn Mak-kiefry z Karaleŭskaj prakuratury.
«Jana mieła nienaležnyja stasunki z Sondersanam paśla taho, jak jaho vyzvalili, i dokazy śviedčać, što jany pačalisia jašče tady, kali jon byŭ u turmie», — dadaŭ jon.
«Hetyja stasunki, a taksama toj fakt, što Piehh nie paviedamiła pra daŭhi svaim pracadaŭcam, — heta hrubaje parušeńnie, jakoje nanosić nadzvyčajnuju škodu hramadskamu davieru», — adznačyŭ Mak-kiefry.
Dakładnuju datu prysudu Pieh jašče nie abviaścili.