Skančvajecca lehiendarnaja antyŭtopija pra ZŠA. Što čakać ad finału «Apoviedu słužanki»

Vychodzić apošni siezon znakamitaj antyŭtopii «Apoviedu słužanki» (The Handmaid’s Tale) pra tatalitarnuju budučyniu ZŠA. «Naša Niva» tłumačyć, čamu heta vydatnaja nahoda pierahledzieć sahu.

Džun Ozbarn (Elizabiet Mos). Fota: kadr z trejlera

Usio pačałosia ŭ 1985 hodzie. Tady kanadskaja piśmieńnica Marharet Etvud vypuściła raman «Apovied słužanki» — historyju pra ZŠA blizkaj budučyni, dzie da ŭłady pryjšli relihijnyja radykały-kansiervatary.

Jany pieranazvali krainu ŭ honar biblejskaha rehijona Hałaad i žorstka abmiežavali ludziej u pravach. Amieryka pa Marharet Etvud — miesca, dzie lutuje hramadzianskaja vajna dy isnujuć publičnyja śmiarotnyja pakarańni, a niaščasnaja kasta žančyn-słužanak vynošvaje dziaciej dla zamožnych mužčyn-kamandoraŭ.

Uvohule, žyćcio ŭ Hałaadzie nam raskryvajuć vačyma žančyn. Im u novaj krainie zabaroniena čytać i pisać, nie kažučy pra zvyčajnuju pracu — zastajucca tolki «žanočyja» zaniatki našktałt sadoŭnictva. I mienavita vačyma žančyn nam raskazvajuć, jak libieralnaja kraina pieratvaryłasia ŭ fundamientalisckaje piekła, dzie zabaroniena mastactva, a vulicy zastaŭlenyja błakpostami.

Jak my heta dapuścili — voś pytańnie hałoŭnaj hieraini, na jakoje niama adkazu.

Adnajmienny sieryjał pa «Apoviedzie słužanki» vyjšaŭ u 2017-m, padčas pieršaha prezidenckaha terminu Donalda Trampa. Chutka čyrvonaje adzieńnie słužanak pierakročyła z teleekranaŭ na vulicy ZŠA, a potym i inšych krain Zachadu. Žančyny apranali jaho na pratesty pa pytańniach, choć niečym źviazanych z žanočymi pravami. Jašče tady, u pieršy termin Trampa, razychodzilisia płakaty ź im i Pucinym, dzie Tramp byŭ apranuty ŭ toje samaje adzieńnie słužanki.

Fota: kadr z trejlera

«Apovied słužanki» papiaredžvaŭ pra toje, jak chutka možna stracić zdabytki demakratyi. Apošni siezon sieryjała, jaki vychodzić ciapier, nahadvaje pra heta ŭ samy razhar novaha terminu Donalda Trampa.

My znoŭ viartajemsia ŭ śviet Džun Ozbarn, byłoj słužanki. Tady, kali ZŠA tolki pieratvaralisia ŭ Hałaad, jana sprabavała źbiehčy z krainy razam z mužam i dačkoj, ale ich ź dziaŭčynkaj zatrymali. Tahačasnaja Amieryka — śviet, dzie šmat žančyn biaspłodnyja, ale Džun heta nie zakranuła, i tamu ź jaje robiać słužanku.

Za nastupnyja piać siezonaŭ jana projdzie šlach ad razhublenaj maci, u jakoj zabrali dzicia, da vajarki, hatovaj zładzić supraciŭ cełamu režymu. Siońnia Džun Ozbarn ź jaje vohniennym pozirkam i addanaściu sapraŭdnym ideałam — adna z samych jarkich hieraiń na zachodnim telebačańni. Niezdarma Elizabiet Mos, vykanaŭca roli Džun, maje za hetuju pracu ŭ kišeni hałoŭnuju televizijnuju premiju «Emi» i naminacyju na «Załaty hłobus».

Ad šostaha siezona my čakali revalucyi, i ŭ trejlery nam pakazvali kadry taho, jak naradžajecca paŭstańnie. Ale pačatak finalnaha siezona pryvodzić nas nie na pole boju, a ŭ kanadski ciahnik, jaki my pakinuli ŭ kancy 5 siezona. Tam sustrakajucca Džun i Sierena, žonka kamandora Freda — u ich siamji Džun niekali była słužankaj. I heta niezdarma, bo «Apovied słužanki» daśleduje nie tolki tatalitarny śviet, ale i dynamiku čałaviečych adnosin u im, toje, jak siabie pavodziać byłyja achviara i katavalnica, kali nivodnaja ź ich nie maje pieravahi.

Fota: kadr z trejlera

Pakul što vyjšli tolki try sieryi šostaha siezona, ale ŭžo vidać, što sieryjał sychodzić na vysokaj nocie. Tatalitarny Hałaad, achutany vajnoj, pradkazalna maje prablemy ŭ ekanomicy, i lidary krainy vyrašajuć stvaryć palehčanuju viersiju režymu, kab pradać jaje zamiežnym palitykam, a zaadno i damahčysia ad ich viartańnia ŭciekačoŭ — byłych amierykanskich hramadzian. Atrymlivajecca bolš paśpiachova, čym chaciełasia b.

Dalejšyja sieryi pakažuć nam paŭstańnie ŭ Hałaadzie, ale na poŭny chepi-end nie varta spadziavacca. Reč u tym, što Marharet Etvud vypuściła ŭ 2019-m praciah «Apoviedu słužanki» — raman «Zapaviety» (The Testaments), i mienavita ŭ im raskazvajuć, što budzie paśla Hałaada. Hety tvor taksama chutka pieratvorać u sieryjał, tamu nie čakajem, što demakratyja pieramoža ŭ ciapierašnim siezonie.

«Apovied słužanki» važny nie mahčymaściu chepi-enda, a tym, jak jon pakazvaje baraćbu za volu i addanaść ideałam. Tak, jon budzie bližej hledačam ź fieministyčnymi pohladami, ale idei, za jakija zmahajucca Džun i kampanija, datyčać nie tolki žančyn. «Apovied słužanki» pakazvaje, jakoj strašnaj moža być budučynia, kali zdradzić hetym idejam, i jak doraha moža kaštavać vola.

Kamientary da artykuła