Jak kamanda Cichanoŭskaj viała pieramovy z administracyjaj Vučyča

Režysior Andrej Hniot, jakoha ź Sierbii chacieli departavać u Biełaruś, u kancy kastryčnika narešcie zmoh pakinuć Sierbiju — praz hod paśla zatrymańni. Kab heta atrymałasia, demakratyčnyja siły viali pieramovy ŭ tym liku z administracyjaj prezidenta Sierbii Alaksandra Vučyča. Daradca Cichanoŭskaj pa pytańniach dypłamatyi Dzianis Kučynski raskazaŭ «Našaj Nivie», jak heta vyhladała.

Karotkaja sustreča Cichanoŭskaja z Vučyčam na palach samitu ŭ lipieni. Fota tut i dalej: Ofis Cichanoŭskaj

Dzianis Kučynski apisvaje, što, kab vyzvalić Hniota, pracavali adrazu pa niekalkich kirunkach. Pieršy — jurydyčny (da spravy padklučylisia sierbskija advakaty, biełaruskija jurysty Hanna Macijeŭskaja, Maryja Kolesava-Hudzilina, kamanda jurystaŭ Ofisa Cichanoŭskaj — u pryvatnaści Lavon Marozaŭ). Druhi — mižnarodna-palityčny (sustrečy z partniorami biełaruskich demsiłaŭ z roznych krain, kab pryciahnuć bolš uvahi da situacyi). Treci — sierbski (praca niepasredna z administracyjaj prezidenta Sierbii Alaksandra Vučyča).

Pieršy kantakt z Vučyčam u Cichanoŭskaj byŭ u lipieni na samicie Jeŭrapiejskaj palityčnaj supolnaści.

«I padčas hetaj sustrečy prezident Sierbii daŭ viedać, što jon sočyć za spravaj i šukaje peŭnaje vyrašeńnie», — kaža Kučynski.

Druhaja važnaja sustreča adbyłasia ŭ ramkach Hieasamblei AAN u vieraśni. Kamanda Cichanoŭskaj bačyła, što ŭ prahramie jość supolnyja viačery, dzie budzie Vučyč. Zahadzia dasłali kamandzie Vučyča list. Naładzić kamunikacyju dapamoh Aleks Sorasa (syn miljardera i fiłantropa Džordža Sorasa) — jon padzialiŭsia blizkim kantaktam u administracyi Vučyča. «Druhi čałaviek u Sierbii», — apisvaje toj kantakt Kučynski.

Cichanoŭskaja z daradcami na sustrečy z Aleksam Sorasam

Adnak na viačery sustrecca nie atrymałasia. Tady Dzianis Kučynski zastaŭsia ŭ Ńju-Jorku na pryjom Sorasa, kab pabačycca z tym čałaviekam.

«Tady ja ŭpieršyniu ad kamandy Vučyča pačuŭ, što Hniota nie vydaduć režymu Łukašenki. I my damovilisia, što pasprabujem znajści supolnaje rašeńnie», — zhadvaje Kučynski.

Pa jaho słovach, była infarmacyja, što Andreja Hniota mohuć vypuścić raniej, napačatku kastryčnika. Ale ŭ vyniku spatrebiłasia bolš času.

Andrej Hniot paśla taho, jak pakinuŭ Sierbiju. 31 kastryčnika 2024 hoda jon prylacieŭ u ES. Fota: sacsietki

«Z taho, što sierbski bok abiacaŭ, usio tak było i zroblena», — adznačyŭ Dzianis Kučynski.

Jon padsumoŭvaje: dypłamatyja pracuje.

«Navat niahledziačy na adroźnieńni ŭ palityčnych pohladach, jakija, biezumoŭna, isnujuć ź Sierbijaj, čałaviečyja stasunki mohuć ratavać žyćci».

Učora Dzianis znoŭ razmaŭlaŭ z kamandaj Vučyča i padziakavaŭ im za supracu.

«Zrazumieła, što resurs Ofisu abmiežavany, ale kamanda Cichanoŭskaj praciahnie i nadalej dapamahać biełarusam. My svaich nie kidajem — kiejs Hniota heta čarhovy tamu prykład», — dadaje Kučynski. Jon zhadvaje, što raniej Ofis padklučaŭ svaje kantakty, kali ŭ tajskuju turmu trapiŭ hurt Bi-2, a taksama kali biełarusaŭ zatrymlivali ŭ Armienii.

Kamientary da artykuła