Медыцынскі турызм у Беларусі за 2024 год вырас амаль на 20%. Адкуль едуць і якія паслугі ў топе?
Медыцынскі турызм у Беларусі за 2024 год вырас амаль на 20%. Па дапамогу да беларускіх лекараў звярталіся жыхары 157 краін, паведаміў тэлеканал СТВ.
Большасць замежных пацыентаў — прадстаўнікі краін СНД (перш за ўсё расейцы). У топ таксама ўвайшлі жыхары Казахстана, Латвіі, Сербіі і Кітая.
Па словах загадчыцы аддзялення Гомельскай гарадской клінічнай бальніцы хуткай медыцынскай дапамогі Ілоны Дзям'яненка, замежнікаў прыцягвае прафесіяналізм медыкаў, наяўнасць высокатэхналагічнага абсталявання і даступнасць лячэння.
Раней кіраўнік дзяржаўнага праекта «Клінікі Беларусі» Ян Бядушэўскі адзначаў, што самыя папулярныя напрамкі медыцынскага турызму — транспланталогія, анкалогія, кардыяхірургія, пластычная хірургія, акушэрства, нейрахірургія, траўматалогія, афтальмалогія, піша Smartpress.by.
Акрамя таго, турысты-пацыенты едуць для дыягнастычных абследаванняў, аднаўлення пасля перанесеных захворванняў, адпачынку ў аздараўленчых комплексах.