Спецпрадстаўнік Трампа: Украіне могуць быць не патрэбныя рускамоўныя рэгіёны
У сваю чаргу Дональд Трамп заявіў, што «на гэтым тыдні» Расія перадасць ЗША адказ на прапанову аб «спыненні агню» ва Украіне.
Прэзідэнт Расіі Уладзімір Пуцін. Фота: Maxim Shemetov / Pool Photo via AP
«Украіне могуць быць не патрэбныя рускамоўныя рэгіёны. З акупаваных пяці абласцей Пуцін можа атрымаць частку тэрыторый, але не ўсе», — заявіў спецпрадстаўнік Трампа Стыў Уіткаф.
«І РФ, і Украіна зацікаўленыя ў гэтых 5 рэгіёнах [відаць, маюцца на ўвазе Крым, Данецкая і Луганская акупаваныя вобласці, а таксама частка акупаваных Запарожскай і Херсонскай абласцей,— НН].
Зараз галоўная праблема — не працяглая агрэсія РФ, а нежаданне Украіны аддаваць землі», — сказаў ён.
У сваю чаргу Дональд Трамп заявіў, што «на гэтым тыдні» Расія перадасць ЗША адказ на прапанову аб «спыненні агню» ва Украіне. Пра гэта ён сказаў у Белым доме падчас сустрэчы з прэм’еркай Італіі Джорджай Мелоні.
У Трампа спыталі, у які момант ён прыме рашэнне пра тое, ці гатовая Расія да спынення агню — і, калі спатрэбіцца, узмоцніць супраць яе санкцыі.
«Пабачым, чым гэта скончыцца. Мы атрымаем ад іх (Расія) адказ на гэтым тыдні, зусім хутка, і пабачым», — адказаў прэзідэнт ЗША.